س: ايه هو اللينوكس ده بقى؟
جـ: اللينوكس ده نظام تشغيل للكمبيوتر بتاعك. نظام التشغيل ده حاجه زى أعلى إداره فى شركه؛ بيتحكم فى كل حاجه ومسئول عن إزاى الحاجات بتشتغل. اللينوكس نظام تشغيل تمام زى الوندوز.
س: طاب وإيه اللى يخليينى اعوز لينوكس بقى؟ مأنا عندى وندوز.
جـ: ﻷسباب كتيييره أوى. لينوكس حر - وببلاش. من غير أى فلوس، وتقدر تعمل فيه/بيه زى ما تحب، تقدر تدى منه نسخ مجانية لصحابك ، أو "تعدل فيه" لغاية ما توصل لدرجة المصدر البرمجى . المصدر البرمجى ده زى وصفة الأكل ،مجموعة التعليمات اللى بينفذها الكمبيوتر واللى لما نجمعهم مع بعض يعملوا نظام التشغيل.
س: مقدرش اعمل كده فى الوندوز؟
جـ: ﻷ. انت مش بتجيب الوندوز بالمجان، والمصدر البرمجى أصلا مش متاح مع الوندوز. انت مزنوق مع نظام الوندوز زى ما هو.
س: بس ماهو الوندوز بيعمل كل الحاجات اللى أنا عاوزو يعملها.
جـ: مش صحيح. الوندز بيعمل بس الحاجات اللى انت بتبقى متوقع أنه يعملها. فى حاجات تانيه كتييير أوى تقدر تعملها بالكمبيوتر بتاعك، بس مابتعملهاش بالوندوز ﻷنك يا إما ماتئدرش، أو ﻷنها صعبه، أو ﻷنها بتكلف فلوس كتير لسوفت-وير زياده، أو ﻷنها مش راسية كفايه.
س: زى ايه؟
جـ: جربت مونتاج الصوت أبدا قبل كده؟ ببلاش؟ مونتاج الفيديو؟ ببلاش؟ مونتاج الصور؟ تعمل سيرفر e-business كامل فى 15 دقيقه؟ تشغل أى نوع من فيلات الأوديو/فيديو من غير ماتحتاج تصطاد الكوديكس (codecs)، لأنها بتشتغل؟ ببلاش؟ عايز برنت سيرفر (print server) للأوفيس ببلاش؟ طاب ايه رأيك فى ويب سيرفر (web server)؟ ولا إيميل سيرفر (e-mail server)؟ ولا انت محتاج بس نظام نشر ديسكتوب (desktop publishing system)؟ ولا ايه رأيك فى كل الحاجات دى فى نفس الوقت؟
س: ببلاش؟
جـ: ببلاش. اللينوكس حر وببلاش لأنه مكتوب عن طريق ألاف من المتطوعين من كل حته فى العالم، مش بتاع أى شركه زى ما الوندوز بتاع ميكروسوفت. اللينوكس حقيقى بتاع الناس، ديمقراطية ديجيتال.
س: طاب ومين هايساعدنى؟
جـ: إحنا، مجموعة مستخدمى اللينوكس المصرية (www.eglug.org).
س: ببلاش؟
جـ: أيييوه، إحنا كمان متطوعين.
س: أنا مش مصدئكو. ماعدش فى حاجه زى غدوه ببلاش.
جـ: بس انت تعاله وبص بصه، إحتمال تتفاجئ