س: لينوكس؟ يونيكس؟ ايه الفرق؟

ج: يمكن ده تبسيط زيادة شوية لكن اليونكس مش نظام تشغيل؛ اليونكس فكره. لما تستخدم Solaris أو AIX أو لينوكس، انت بتستخدم نظام تشغيل طلع من مجموعه متراكمه من الأفكار واللى اسمها يونكس. فى الحقيقه، احنا بنميل لتسمية لينوكس و Solaris مثلا، نكهات من يونكس. الموضوع عامل شويه زى الأيس كريم: لما تاكل أيس كريم فانيليا، ده بالتحديد نكهة فانيليا، لكنو برضه معمول بالطريقه اللى الأيس كريم معمول بيها. عشان كده، اللينوكس مش يونكس، لكنو نظام تشغيل شبيه باليونكس.

س: هو لينوكس مش نظام تشغيل سطر أوامر؟ عشان كده أنا بافضل NT/Windows XP/2000.

ج: ده صحيح تماما. قلب لينوكس فى سطر الأوامر. بس ده مش معناه، على أى حال، ان كل شغلك على لينوكس لازم يكون من سطر الأوامر. فى واجهات جرافيكس ممتازه تقريبا لأى مهمه تنفيذيه ممكن تفكر فيها. الطريقه اللى معظم التطبيقات (applications) دى اتصممت بيها هى انو يبقى فى برنامج سطر أوامر، بعد كده تبنى برنامج تانى يكون واجهة مرسومة من فوقيه. ده معناه انك حر تختار أى طريقه تعجبك عشان تنجز الشغل بتاعك.

على مستوى أعمق، ده مفهوم أساسى فى اللينوكس؛ أدوات سطر الأوامر بـواجة جرافيك اختياريه. ده مش بس معناه إنك تقدر تختار إزاى تنجز الشغل، لكن كمان بتفصل الكود و التصميم بتاع الواجهة من الـكود الى بيقوم بالشغل الفعلى. وعشان كده، لو لأى سبب الـواجهة الجرافيك مش ممكن الوصول ليه (زى لو بتعمل telnetting عشان تعمل شغلك) لسه برضه تقدر تنجز كل حاجه.

وعلى العكس تماما، لو معندكش الـ GUI فى الوندوز يبقى انت مزنوء. فى الوندوز، مافيش فصل للـ GUI من نواة عمليه نظام التشغيل. ده واحد من الأسباب الرئيسيه ليه الأنظمه المبنيه على يونكس زى لينوكس معروفين بالثبات بتاعهم. المحافظه على الحاجات بسيطه ومتقسمه لأجزاء مستقله.

س: خللينا نقول أنا عاوز ابدأ أفكر فى الاستقاده من اللينوكس فى مكان شغلى. أبدأ منين؟

ج: ده فى الحقيقه يتوقف على احتياجاتك. بالنسبة لوظائف السيرفر أقدر أقولك و أنا متطمن ان اللينوكس لحد كبير يقدر يعمل كل حاجه انت محتاجها. عشان كده ده غالبا مكان كويس للبدايه. ايه رأيك فى تشغل أيميل سيرفر على الشبكه بتاعتك ؟ ده غالبا مش هياخد أكتر من ربع ساعة.

و احنا فيها، ممكن برضه تفكر فى استخدام لينوكس سيرفر للمفلات المشتركة لأجهزة الويندوز اللى عندك. و سيرفر للبرينتر. وماتقلقش من كل مستخدمين الماكنتوش دول؛ اللينوكس فصيح فى AppleTalk وبسعاده هيوصللهم ببقيت العالم.

محتاج ويب-سيرفر كمان؟ خدلك بصه على أباتشى (Apache). أباتشى ده أكتر ويب سيرفر مستخدم فى العالم، ووبئاله كده مدة طويله أوى وهايفضل كده لفتره طويله أوى. وده مش مفاجئ لأنه حر، مفتوح المصدر، مستقر، مرن بشكل مايتصدئش، وناصح.

عاوز Application server؟ استخدم TomCat أو JBOSS. عاوز LDAP؟ أهو عندك. Groupware؟ فى بدايل كتيره. FTP؟ أيييوه.سيرفر محادثة؟ أكيد. سيرفر قواعد بيانات؟ MySQG/postgreSQL/Firebird/الخ.

و كمان لينوكس بيعمل فاير-وول ممتازه و/أو راوتر.

زى ما قولنا، الموضوع كله متوقف على احتياجاتك، حاول تشرح طلباتك لواحد من المتطوعين وشوف هما يقدرو يطلعو بإيه.

س: حلو أوى، إيه بقى نظام عقود الدعم و الضمان و الحاجات دى؟

عشان كده احنا عندنا شركات لينوكس، شركات كتير بيعرضو عقود دعم وأنواع الضمانات اللى انت ممكن تكون متعود عليها، الكويس ان الدعم دلوقتى بقى سوق فيه منافسه حقيقيه عشان كل الشركات دى ممكن توصل للمصدر البرمجى وتقدر تعدل وتخدم السوفت-وير بأى طريقه ممكنه. مش عاجبك الـService provider بتاعتك دلوقتى؟ غير الشركه وشوف واحده أحسن. الحاجه التانيه الكويسه إنك ممكن تروح لشركه محليه، أو شركه صغيره لو حبيت. بعد كده، فى دايما جماعات على النت مستعدة تساعدك فى كل أسئلتك و تقدملك دعم مجانى، ممكن حتى تتصل بمبرمجين السوفت-وير على طول، أو تعينهم عندك،

س: أد إيه لينوكس ماشى على المواصفات و المعايير؟

ج: اللينوكس ممكن يكون هو نفسة معيار للمطابقة للمواصفات.

لما تفكر فيها، ماكنش هايكون فى لينوكس من غير مقاييس ومن غير الإلتزام فى اتباعها. فى ميات من الألوف من المبرمجين باتساع العالم شغالين فى لينوكس، والطريقه الوحيده لمصمم interface فى بومباى، مثلا، عشان ينسق شغله مع مبرمج فى نيويورك أنو يكون فى شوية مقاييس بتحكم الشغل. ده بيكون فى بروتوكولات الشبكات، تصميم الـUI، بناء الملفات، هيراركية نظام-الملف، كل أنواع الـ API، الخ.

المقاييس هى الهوا اللى لينوكس بيتنفسه.

اللينوكس حتى بيعرف إزاى يتعامل مع أنظمه تانيه مش بتستجيب للمقاييس العامه. مثال كويس أوى هو وثائق مايكروسوفت أوفيس، ودول مملوكين ولسه ملهومش توثيق واللى (بعد شغل جامد كتير وهندسه عكسيه reverse engineering) ممكن يتشافو ويتعدلو باللينوكس.

اللينوكس بيتكلم كل اللغات، حتى اللغات البايظة.

س: تمام، انتو اقنعتونى. أنا هركب لينوكس النهارده. سيرفر ميل، سيرفر ويب، سيرفر قواعد بيانات، سيرفر DNS، ديسكتوب لينوكس فى قسم التسويق، بطارييق فى الحسابات، ماندريك على جهازى الشخصى ميكرو لينكس على الالة الحسبة بتاعتى.

ج: ماشى ماشى، إهدا شويه. سهل ان الواحد يبقى متحمس للينوكس، احنا عارفين.

(أهلا بيك معانا و متنساش تنضم ل http://www.eglug.org