Manal and Alaa's bit bucket

حلوة قوى يا سقراط

حاسة اللمس بالنسبة لي خاصة جدا في أنها بتسمح بخلق علاقات مع حاجات تانية غير الناس. اللعب مع الحيوانات أساسا باللمس، كمية من التواصل مع القطط بس بأطراف صوابعك. تحسس حوالين ودنهم، يرفعوا رأسهم و تهرش تحت دقنهم يحركوا راسهم و يلمسوا ايدك، يتمسحوا فيك، يشدوا انتباهك بلمس رجلك بجسمهم، أو بلمس وشك بمناخيرهم. الكلاب تحضنهم تحاول تلمس الجسم كله بايدك، تدعك حوالين الودن برضه، يلحسوك و يلمسوك بمناخيرهم.

مش بس الحيوانات حاسة اللمس بتفتح الباب لتواصل و علاقات مع الجمادات. لمس آلة موسيقية، و يا سلام لو كونترباص، لازم تحضنه و الا هيقع، و الكونترباص حميمي قوي مش بس بيسيبك تلمسه ده بيردهالك و هو في حضنك بيرسل ذبذبات قوية في جسمك لحد ما كل نوتة ترن فيك و تطلع من جواك. ما جربتش قبل كده ألمس هارب بس الفرجة على العازفين ملهمة، لمسة بسيطة جدا و رقيقة جدا، مداعبة بس بس بيجي منها كلام كتير.

لمس لوحة مفاتيح، معرفش أقعد على الكمبيوتر من غير ما ايدي تفضل لامسة لوحة المفاتيح، محبش الماوس أفضل الكيبورد، احساس فظيع بالقوة، لمسات سريعة متدفقة و ألاقي العالم كله تحت أمري، لما أجي أبرمج أشغل موسيقى اليكترونية، أفضل موسيقى معرفش مؤلفها عشان أحس أنها طالعة من مكنة و صوابعي تطير و باللمس بس تبني عالم كامل.

لمس قطعة فنية، لمس سطح خشبي قديم بس عشان أحس بملمسه (مش عارف هعمل ايه لما أجيب مكتب جديد سطحه أملس). لازم ألمس درابزين السلم مهما كان متسخ. لمس زجاجة نبيذ، مبحبش ملمس الورق بس أعرف ناس كتير بتحتبه. تحط ايدك في جيبك و تلمس مفاتيحك و العملات و البطاقة و تقعد تلعب فيهم بايدك.

أعمال جاودي المعمارية لازم تتلمس، الراجل بنى جنينة كاملة تفهمها باللمس أكتر من بالبصر، فيها نتوئات على سيراميك أبيض لا يمكن أصلا تاخد بالك منها غير بمجهود الا اذا كنت بتلمس طبعا، التنين الأزرق اللي في مدخل الجنينة كل الزوار مبيقدروش يمسكوا نفسهم، لازم يلمسوه، لازم يتصوروا بيحضنوه.

و النباتات، الكائنات اللي مشاركنا الحياة و بننسى أنها حية، لا يمكن أمشي جنب شجر منخفض من غير ما ألمس الورق، و في القاهرة اللي يندر فيها النباتات لازم أقطع ورقة من أخر شجرة و أمشي أفرك فيها زمن. أقعد على نديلة و أمشي ايدي عليها، لو لمست الطين ما أحسش بحاجة لكن لما ألمس الحشيش أحس أني بلمس الأرض من جوه، الحشيش جدوره مش عميقة، بس الشعر برضه جدوره مش عميقة و مع ذلك لما حد يلمس شعري و يحسس عليه جسمي كله بيحس بيه. الشجر، يا نهار أسود على لمس الشجر، الشجر مش أنواع الشجر افراد، تشوفه بسرعة تقول شبه بعضه، لكن كل شجرة بتكبر بشكل مختلف، بتفرع، بتكلكع، بتخشن في أماكن و تنعم في أماكن، مأدبة للمس.

كل ما ألمس شجرة أفتكر كتب ماريون زيمر برادلي، و ازاي بطلاتها بيلمسوا الطبيعة و الأرض و الآلهة عن طريق الشجر، ازاي بيناموا على الأرض أو يحضنوا شجرة أو يقفوا داخل شجرة مجوفة و يسكتوا و يحسوا بنبض الأرض، بدفق الحياة، برتم الكون و أزا لما يلمسوا حجرة جدورها عميقة بيقدروا يستمدوا قوة و يتحكموا في الحياة حواليهم، مورجين تغزل و تنسج تعاويذها السودة في القماش و بعدين تلمس الأبرة بصباعها، لمسة واحدة بس و تسترجع فيها كل المرات اللي لمست الأرض و الحجر و الشجر و يموت عدوها في نفس اللحظة.

متعة الفرجة على اللي بيلمسوا النار من غير ما يتألموا (أو من غير ما يسيبوا الألم يتحكم فيهم)، لمس مجداف خشن و بعدين تمسكه جامد و يحك في ايدك يصنفرها و هو بينقلك لمسة النيل ذات نفسه، عبقرية أنك تعرف امتى تسيب المجداف و أمتى تمسك فيه، أمتى تشد و أمتى تزق بأنك تفضل لامسه و حاسس بيه في كل لحظة، لما أركب فلوكة لازم أدلل ايدي و ألمس المياه، أيام التجديف كان نادر لما ألمس المياه، عن طريق المجداف لمست النيل كله مش محتاج أنزل ايدي في المياه. و ان كان التجديف بعد شوية بيقتل جلد الايد و يبوظ احساس اللمس تماما، على العموم بطلناه بعد مدة قصيرة.

لمس الأكل اثناء طبخهه، و الأكل بالأيد. لا يمكن أستطعم طبيخ طباخ لابس جوانتي مهما كانت الاعتبارات الصحية، دي ملمستش الخضار و هو مبلول و اللحمة و هي نية. الطماطم لما أفرتكها قبل ما نقلبها سلطة، الواحد يدفن ايده في كومة بسلة خضراء نية، أو يدفن ايده في مكرونة مغسولة بعد سلقها، ملمس ناعم يزحلق، مياه ساقعة و حرارة و دفئ مستخبيين في المكرونة، تلمس اللحمة و أنت بتقطعها و الدهن يلزق فيك و لا تتهز و أنت بتفكر أن ده كان كائن عايش من كام يوم، بالعكس تحس بنشوة و تفكر يا تري الصياد بيحس بايه، و تفتكر القطط و فخرها الشديد لما تصتاد فأر و تقعد تلف بيه البيت كله و تتمنظر على حريمها، و القطط الصغيرة لما تديهم لحمة نية و تصحي فيهم غريزة الصياد و يقعدوا يتمخطروا كأنهم اصطادو الفرخة بنفسهم مثلا (اللحمة يعني فراخ طبعا عدا أيام العيد لحسن حد يحسدنا ولا حاجة).

لما النور يقطع و تمشي في بيتك في الضلمة باللمس بمهارة عالية رغم أنك متدربتش قبل كده، كأن ايدك فاهمة كل حاجة عينك شافتها، كأن ايدك حافظة كل حاجة عينك شافتها.

الرغبة المرعبة في لمس اللوحات و التماثيل في المتاحف حتى و سلك جهاز الانذار واضح، حتى و أنت عارف أن لو كل حد عمل كده اللوحة لا يمكن تستحمل.

ولا الحواس لما تدخل على بعض، عمرك سمعتي مزيكا حلوة قوي و حسيتي كأن جسمك قشعر؟ أو كأنك دفيتي؟ أو كان حد دلك رأسك؟ مش برضه لما حاجة بتأثر فينا بنقول لمستني من جوه؟ لمستني في المكان اللي مش ممكن أتلمس فيه بجد؟

حكى لي جدي عن باحث بيطري مصري مش فاكر أسمه للأسف رصد أن العجول المولودة حديثا اللتي لم تلعقها أمهاتها بعد الولادة على طول، بيظهر عندهم أعراض اضطراب نفسي.

و بعدين تلمس محبوتك، أي لمس، تقعدوا تقروا أو تشتغلوا بس جسمكم لازق في بعض، تحضروا حفلة أو تتفرجوا على فيلم بس تمسكوا ايد بعض، تناموا تماما بس في حضن بعض. لحظات المفروض أنك فيها بتقفل على نفسك بتبقى لوحدك بس باللمس بس بتفضلوا مع بعض، بدل ما تقفل على نفسك بتذوبوا مع بعض في لحظة واحدة.