باي باي عادلي، والعيش والحلاوة علينا

يوم 26 يونيو (اليوم العالمي لمناهضة التعذيب) الساعة أربعة ونص، ح نتجمع كلنا ونحتفل بإنجازات حكومتنا اللي دايما بنعايرها فى أصفارها الكتيرة (زي صفر المونديال الشهير)، بس بصراحة ومن غير زعل بنطنش سيرة إنجازات حكومتنا، وبننسى إن فيه حاجات بتحقق فيها الحكومة أكتر من مية في المية.

تعالوا في ميدان لاظوغلي يوم 26 يونيو الساعة أربعة ونص نحتفل بالشخص المسئول عن الإنجازات دي، وندي له وسام الكرباج السوداني.

في عهد حبيب العادلي أصبح أقصر طريق للصعود من الأرض للسما هو مباني وزارته، ومن غير ما يتحمل البني آدم المصري أي تكاليف: كله على حساب الحكومة. وفي عهده تربية الإنسان الأدب مابقتش مهمة وزارة التعليم بس. دي الداخلية كمان بتربينا كلنا. يمكن إيدها تقيلة شوية، بس الحق فيه مساواة، ومعندهاش خيار وفقوس: اللي له فى السياسة زي اللي مالوش.

ويمكن فيه توصية أكتر على اللى ملهوش. الستات زى الرجالة، وحتى الأطفال مش محرومين من خدماته. ده حتى محدش مننا ييتعب نفسه ويكلف خاطره. رجالته هما اللي بيتعبوا وييجوا لنا لحد عندنا. حاجة زي الهوم دلفري كده. والكرم عندهم زايد: لو مالقوش الشخص المطلوب أهو أي حد من عيلته يسد. وساعات الكرم يزيد فياخدوا العيلة كلها.

علشان كده اخترنا نبدأ تكريم رجالة الإنجازات بتوع الحكومة بالعادلي. بس احنا مش حنتعبه. احنا اللي ح نروح عنده مش ح نستنى لما يبعت لنا حد من رجالته، وكمان مش ح ننسى رجالته. احنا ح نريح خالاتهم والعيش والحلاوة علينا بس قولوا انشالله.

مركز هشام مبارك يدعوكم للاحتفال باليوم العالمي لمناهضة التعذيب قدام وزارة

التعذيب من الساعة أربعة ونص، والساعة ستة في نقابة الصحفيين.

باي باي عادلي، الشعب جاي يودعك.