Manal and Alaa's bit bucket free speech from the bletches

معاك في الكلام عن الهبل في تلخيص الشرق أوسطي، لو قريت فوق توماس بيقول التنكيت عندهم في الدنمارك دائما بيستخدم فيه stereotypes نمطية مع الوعي التام بأنها نمطية، معرفش طبعا الكلام ده صح ولا غلط و رغم ثقتي في كلامه لكن برضه تضايق شوية.

أما موضوع النكتة ممكن جدا ينشروها و بينشر زيها و ألعن منها و كمان انكار الهولوكوست عندهم دارج جدا.

الدنمارك فيها قانون بيجرم نشر بروباجاندا عنصرية، نادر تطبيقه جدا و ولا ينطبق على النكت، أنا عارف أن فيه حوالي تلات أحكام ضد ناس كانوا معادين للمسلمين لكن مش عارف تفاصيلهم معرفش حكم عن معاداة اليهود غير حكم على حزب التحرير الاسلامي و كانوا بيدعوا لقتال اليهود مش بينكتوا.

لكن أعرف عن حالات كتير اتقال فيها كلام معادي لليهود و محصلش حاجة، مثلا داجو من حزب الوسط قال أن الشعب الدنماركي أخطأ لما ساعد اليهود في الهروب من النازي في 1943.

اللي أسوأ منها مرة عضو برلمان كان في التليفزيون في مناقشة عن مجموعة من اللاجئين الصوماليين و هل يسمحولهم يدخلوا البلد ولا لأ، الراجل قال ما معناه المفروض نشحنهم في طيارة و نرميهم منها على الصومال.

دي ناس لم تحاكم، الانطباع اللي عندي أن القانون بيجرم اللي يدعوا لعمل عنصري منظم.

عندهم جماعات نازية جديدة و من حقهم يتظاهروا و في المعتاد بيرفعوا يفط معادية جدا لليهود. (الحكومة فشلت في أنها تاخد حكم على شباب لابس تيشرتات مكتوب عليها smash the jews و كانت حجة المحكمة أن smash مش بالضرورة مقصود بيها الأذى البدني).

مش بس كده الدنمارك بتعتبر قلعة لحرية التعبير لدرجة أن الاحتفالات الكبرى للنازيين الجدد كلها بتجرى في الدنمارك، في أواخر التسعينات البوليس منع حوالي 100 نازي من السويد و فنلندا أنهم يدخلوا الدنمارك، حصل عليها هوجة كبيرة جدا في الاعلام و اتهموا البوليس بقمع حرية الرأي.

يعني اللي أنا عايز أقولله أن على حد علمي و بعد بحث و سؤال يبدوا لي أن الدنمارك فعلا فيها حرية تعبير شبه مطلقة و مفيهاش تفرقة في تطبيق الحرية دي.

و ده يفهمني أكتر فزعهم من فكرة أن محدش كان عايز يرسم الرسول خوفا من رد فعل المسلمين.

معلومة على الجنب: أشهر كوميديان في الدنمارك من أصل مصري.