Manal and Alaa's bit bucket

أرسل لى صديق رسالة غاضبة وهو يحكى لى عن أحدى اليفط الإنتخابية التى رآها فى دمنهور
وهو متعجب وقرفان لأن اليافطة أضافت لإسم محمد حسنى مبارك إسم أمير المؤمنين
الغريب إن اليافطة دى عملاها جماعة أنصار السنة المحمدية فى هذه البلد
وأنا فى الحقيقة لا أرى أى أزمة فى ذلك فدائماً ما كان الفرعون الذى يحكم مصر يسطو على ألقاب من قبله
طبعاً هيقول البعض
أيوه بس دى مش قضية فرعنة دى وصلت لأمير المؤمنين -
طب وفيها أيه هى فارقة سرقة لقب رذيس سابق زى سرقة لقب أمير مؤمنين سابق -
والنبى بلاش تريقة عشان ما نخوضش فى أولياء الله -
طب أيه رأيك إنى سمعت واحدة ست عجوزة مش لاقية تاكل بتقول إن ربنا -
بيحب حسنى مبارك وأنه أكيد من إللي خصهم ربنا بحبه
ولما سألتها إزاى ده يا حاجة قالتلى ماهو شوف إحنا بندعى عليه
قد أيه وبرضوا قاعد على قلبنا يبقى أكيد بيحبه
ده منطق مقلوب يا سيدى .. وبعدين ما الحجاج ولا هتلر قعدوا -
على قلب الناس وده مش معناه حب ربنا ليهم
أيوه بس كمان من حق أى حد يشوف حسنى مبارك أمير للمؤمنين بالذات -
مع الإعتبار بعدم وجود لا مؤمنين ولا دياولو يعنى ييبقى أمير المؤمنين بتوع اليومين دول

وقعدت أفكر الراجل ده واخدنا لفين من يوم ما سمعت واحد من بلطجية الحزب الوطنى سنة ٨٧ بيقول عنه إنه صاحب قرار العبور
لحد بتوع السنة المحمدية ( مع خالص أسفى على أتباع محمد وخالص تبرأنا جميعاً من الناس المذكورين دول ) إللى صنفوه مع الخلفاء
وطبعاً ما فاضلش بعد كده غير مستويين أتنين ولو فضل موجود هيحصلوا .. اليوم إللى يقولوله فيه إنه صاحب رسالة ويبقى خاتم المرسلين
وساعتها هيقولوا ده حتى إسمه محمد يبقى هو ده نبى آخر الزمان ... وما حدش برضه هيرد ويادوب كام واحد هيكتبوا فى المدونات
وبعدها بوقت قصير وبالذات مع تجاوزه أعمار الروساء وهو لسه عايش ( طبعاً ده لإنه كما قال عنه السادات راجل جته وما بيفكرش فى حاجة ) مريح دماغه يعنى
ووقتها هيطلع لنا إللى يقول إنالراجل ده مش من البشر .. وطبعاً مش هيبقى قصده ينسبه لذوات الأربع لكنه هينسبه للسماء العلا .. وقليل إن ما عملولوش تماثيل
ورجعنا تانى لعبادة الفرعون .. وأنا شخصياً ساعتها بس هضطر آخد قرابين وأروح على مذبح الإله الفرعون محمد حسنى مبارك لإنه أكيد يبقى على رأي العجوز
إن ربنا بيحبه وأحب أضيف لها إنه يبقى ربنا بيكرهنا قوى قوى قوى وما بقاش يشفعلنا لا صلاة ولا صوم ولا حاجة تانى خالص