Manal and Alaa's bit bucket

رحت أتفرج على فيلم بنات وسط البلد لوحدي
كنت خارجه فقلت بالمرة قبل ما يتشال
كان نوع من التحدي أو التجربة، إني أقدر أستمتع بوحدتي، وفعلاً اللحظات بتكتسب كثافة كده لما بتكون لوحدك..... وقال ايه شاريه لي كتابين وشوية سوداني وقاعده بشرب قهوة قبل الفيلم ما يبدأ
القاعه مكانش فيها غير حوالي خمسة، ولد ومعاه بنتين وأنا وولدين تانيين

خلاصة الفيلم:
- عجبني منظر أحمد بدير بالباروكة والأنسيال الدهب
- كل ما يتهيأ لي إني مبحبش منه شلبي وأشوفها تاني أكتشف إني مقدرش محبهاش "أوي كمان"
- خالد أبو النجا بيعرف يبوس حلو
- محمد خان ده مصر مولودة فيه مش هو مولود ف مصر
- مزيكة الفيلم بسيطة ولذيذة، والسيناريو كمان
- فكرني قد ايه بموت ف محطات المترو... بالذات الفاضية... زي محطة الأوبرا كده
- صدقت نجلاء فتحي لما قالت.... الولايا ملهمش غير ربنا ( من فيلم أحلام هند وكاميليا،يبدو إن محمد خان نصير الولايا)
- شوية تلقائية مبتخسرش
- الحياة مبتحلاش من غير صحبة، ولحظات الدفا هي اللي بتسوى

ممكن أروح الفيلم تاني... المرة دي مع صحابي