Manal and Alaa's bit bucket free speech from the bletches

يا ديوك أنا فاهم أنك بتدور على جذور و أسباب العنف و مش بتبرر لكن فكر فيها كده

من المستحيل في الزمن ده أنك تسكت أصوات الكراهية و المحاولات هتمون عواقبها وخيمة جدا.

أبسط مثال هو محاولات الحكومة لقمع أصوات الكراهية و الفكر التكفيري في أوساط المسلمين، النتيجة هو قمع و تعذيب و اعتقالات واسعة و مع ذلك الفكر اياه لسه موجود و طبعا في الزحمة الحكومة بتستغل الأدوات دي عشان تضرب في مجموعات سياسية ليها شعبية و مش مسئولة عن الوضع (مسئولية مباشرة على الأقل) زي الأخوان .

تفتكر لو مارسوا ده على المسيحيين كمان هنكسب أي حاجة؟ بالعكس السياسات دي من أهم أسباب حالة العنف و الاحتقان اللي أحنا فيها.

و بعدين ازاي هنمنع عن الناس اللي جاي من على الانترنت و الفضائيات، هنعمل زي السعودية و نعمل رقابة على النت و نجرم الديش؟ مينفعش

عشان كده لازم نفكر أولا في ازاي نتفادي وقوع أحداث عنف (مع الاستسلام لأن الأحداث الفردية أو اللي بيقوم بيها جماعات منظمة صغيرة مش ممكن تنتهي تماما)، و بعدين نفكر ازاي نتفادي أن لما تحصل أحداث عنف ميتحولش الموضوع لشغب و تخريب بيشارك فيه أعداد كبيرة ملهاش علاقة مباشرة بمن بدأ الهجوم (يعني ازاي لما واحد يدبح حد في الكنيسة منلاقيش هجوم بعدها على الجنازة)، و بعدها ازاي نوصل لأن يبقى فيه رفض و استنكار حقيقي للقتل و العنف و التخريب ضد الآخر.

هكرر، أنا لا أدعي أن نسبة كبيرة من المسلمين مشاركة أو حتى هتشارك في الهجوم على المسيحيين، لكن الحقيقة الواضحة لأي حد عايز يفتح عينه هو أن نسبة كبيرة، و أجزم أنها الأغلبية مبتتأثرش بالأحداث دي و لا بتنزعج منها زي تأثرها بجرائم أخرى زي مثلا مذبحة بني مزار. بل بالعكس فيه اللي بيعجبه اللي حصل و فيه اللي بيبرر و فيه اللي بينكر و فيه اللي بيقلل من هول الجريمة و فيه اللي بيتهرب بأنه يخلط الأمور و يتكلم عن الأطفال في نيكاراجوا

لازم نشوف حل ميعتمدش على قمع أصوات الكراهية و التكفير و الاستهزاء بدين الآخر ﻷن ده مش هنقدر عليه و عواقب المحاولة وخيمة.