Manal and Alaa's bit bucket free speech from the bletches

هل أنا جمعت روابط بتصف الاعتداء على المسيحيين في كل أنحاء العالم؟ أنا جمعت روابط عن اعتدائات من قبل مسلمين مصريين على مسيحيين مصريين و كانت الاعتدائات يا أما لحجج واهية يا أما عقاب جماعي لجماعة من المسيحيين بسبب فعل قام بيه فرد أو أفراد منهم. تشترك الروابط دي كلها في أن الموضوع انتهى بجرحى أو قتلي أو بتخريب أملاك و بيت و دور عبادة المسيحيين.

هل لو أنا جمعت روابط اعتدى فيها مسيحيين مصريين على مسلمين مصريين لحجج واهية أو كعقاب جمعي يكون فيها قتلى أو جرحي أو تخريب لأملاك و بيوت و دور عبادة المسلمين هلاقي أي حاجة ؟

ايه بقى علاقة الأحداث خارج مصر بالموضوع؟

هل أنا أنكرت أن المسلمين مضطهدين في أماكن ما في العالم لمجرد كونهم مسلمين من قبل شعوب الأماكن دي و أن نتائج الاضطهاد ده بتكون دم سايح و قتلى و تخريب أملاك و بيوت و دور عبادة؟ لا مأنكرتش و مجيبتش سيرة الموضوع أصلا لأنه مش ده الموضوع اللي أنا بتكلم فيه.

يا روح طنط أنت بتعمل زي الصهاينة بالظبط، لما حدي يكلمهم عن الجرائم اللي بيعملوها في فلسطين (اللي هي مش موجهة للمسلمين بس على فكرة) يقوموا يقولوا الهولوكوست و اضطهادنا في أوروبا و حاجات لا علاقة لها بالفلسطينيين بالمرة.