Manal and Alaa's bit bucket free speech from the bletches

زمان لما كنا بنشتغل بالسياسة ( باعتبار ان السياسة شغل موش وجع قلب) كانت تهمة الاختراق والخيانة اسهل حاجة . انا فاكر مرة في اجتماع الخلية ( السرية بالطبع ) ان واحد اتهم مسؤول الخلية انه مباحث واتحداه ان يطلع بطاقة المباحث من جيبه . رغم صغر سني وقتها استهجنت الطلب " معقول واحد عميل شايل بطاقة المباحث ويجي بيها الاجتماع ؟" لكن ما تنبهتش للعبثية في السؤال .. هل المباحث يتدي عملائها بطاقات علشان يركبوا بيها الاتوبيسات مجانا مثلا ؟!

والعبثية الموجودة في الاسئلة بخليني اعيش البتاعة دي اللي اسمها ديجا في يعني الحاجات بتتكرر بعد الف سنة وده يؤكد اننا شعب اصيل عمرنا ما حانتغير !انا عارف ناس شيوعيين بعضهم عايش وبعضهم مات لكنهم عاشوا وسيف العمالة معلق فوق رقابهم من اقرب الناس ليهم .. كأن المباحث بيتعمل اجتماع مرة في الاسبوع عنوانه تعالوا نشوف العملا اخبارهم ايه ؟ اولا المباحث متوولة والظباط مشغولين مين اللي حا يترقى وفين الشقق الرخيصة بتاعة الشرطة والعربيات الياباني . هم برضه من الشعب المصري الكبار بياكاوا الصغار .ومين اللي حايكلها علشان موضوع التعذيب مثلا اتكشف في قسم مركز سمالوط البلد. ثانيا الدولة كلهامتوولة بقيادة رئيسها اللي بينسى اسماء الحاجات وبيسمسها البتاع ده ( ما تعرفش كان قصده لبنان او حزب الله او كوفي عنان او الباذنجان المقلي اللي كبس عل معدته )

نرجع للدستور كصحيفة " ابراهيم عيسى حالة مصرية زي احمد فؤاد نجم مع الفارق ( موش حاقول عليه ) اللي هي صحافة في الغرب بسموها " شعبوية " زي احزاب كده صوتها عالي وعاوزة تستولي على كوبا مثلا وتحولها كازينو قمار ومشخخة . ناس ضاربة وما لهاش في السياسة . زي حكاية نجيب محفوظ بتاعة اللص والكلاب . الراجل الحرامي لقي نفسه فجأة زعيم فصدق. ابراهيم عيسى صحفي شاطر بالمقاييس المصرية باعة صحيفة النبأ ( فاكرينها) لما كبرت في دماغها ونشرت خبر وصور غير واضحة عن راهب او قسيس موش فاكر بيمارس الجنس مع واحدة في كنيسة واتقلبت البلد . ياستار استر .. يعني كان واحد قاعد بكاميرا ومستني الراجل لما تقع في ايده الست اياها وفين ؟ في الكنيسة .. طيب ما تاخدها في الحوش ياراجل . الدستور عاملة زي حكاية النداهة الشعبية اللي تنده له لازم يلبي النداء زي جنود بشار الاسد وابوه حافظ اللي نازلين يلبوا النداء بس موش عارغين جاي منين نفس نظام " البتاع ده " يعني الناس بتصدقها وبتخاف منها .

اهم حاجة في ردود علاء انه المدونات موجودة وحاتكون موجودة وحاتشارك في الحسابات يوم الدين كل واحد يمسك مدونته في يمينه او شماله حسب ما بيكتب من اليمين للشمال او العكس . تخويف الناس بأن مدونة ما او عدة مدونات بتاعة الامن ده عملية امنية في حد ذاتها بتفكرني بموقف الست ام محمود الشغالة من اكل لحم الخنزير . ام محمود كانت بتشتغل عند جكاعة خواجات اصحابي في مصر وجابو مرة شوية مرتديلا من عند توماس الزملكاوي. ام محمود ريقها جري على المارتديلا قلتلها رأفة بها يا ام محمود ده لحم خنزير ياكلوه اهل الكتاب احيانا فقالت وماله مسموح لينا به . سألتها مندهشا ازاي؟ فقالت هناك ربع في الخنزير حلال بس احنا يا مسلمين موش عارفينه فين . سألتها مين اللي قال لك الحكمة دي . قالت الشيخ في الجامع .

بالاختصار ام محمود عايشة في بشتيل واللي ما يعرف بشتيل افكره بان الشيخ جابر من حوالي خمستاشر سنة اعلنها جمهورية اسلامية وغزاها الامن بنفس الدبابات اللي كانت في سيناء .وبشتيل ايضا كانت ملقف زبالة وجم جماعة اقباط صعايدة من حزب الخضر وربوا الخنازير على الزبالة. ايه علاقة الخنازير وام محمود بالدستور والربع المجهول الحلال ؟ اكيد توجد علاقة بس انا موش عارفها .. يعني حاكون احسن من شيخ جامع بشتيل؟