Manal and Alaa's bit bucket

هل تعلم

أن كل من يرتاد جروبي و الأميريكين ابن كلب و ميهموش 90 أسرة يتخرب بيتها بسبب السرطان؟

أن كل مصري يستجرأ يربي قطط يبقي بيتنكر لأصل أهله الفلاحين (بغض النظر عن تربية أهله الفلاحين للقطط عشان يحموا الغلة)؟

أن المصري اللي بيتمحك في الخواجات و بيربي قطط ده أكيد ميهموش البني أدمين و حقوقهم (ما هو هيجيبلهم وقت منين اذا كان بيربي قطط، و ان ضحك عليك و خدعك و بانلك من ناحيته أي نشاط في أي مجال تاني أعرف أن دي خدعة كده بس و تلاقيها جزء من المؤامرة الكبرى بتاعت الغرب اللي بيهمه القطط أكتر من البني أدمين، أيوه الغرب أبو نابين بيقطروا دم هو ده)؟

أن بعضنا جزء من حلقة جديدة في تطور الانسان و بفضل طفرة عنده قدرة خارقة على قراءة الأدمغة و النوايا و المستقبل و يقدروا يقولولك مسبقا نتائج كل الأعمال و وصف كامل للمستقبل و رد فعل كل مصري لأي شيئ؟

أن اللي يطالب بأن العمال تأخد أجورها و بتطبيق القانون يبقي شيوعي؟

أن من بين كل عشرة مصريين في واحد معاه دليل قاطع أن أيمن نور حرامي و ضلالي و جاسوس و بتاع عيال؟

أن من بين كل عشرة الواحد اللي هيسأل ايه هو الدليل القاطع ده غبى و متخلف و جاهل و لا يمكن أبدا يفهم الدليل القاطع؟

أن الضحك من غير سبب قلة أدب؟

أن المساواة في الظلم عدل؟

أن اللي نعرفه أحسن من اللي منعرفهوش؟

أن البيرة التشيكي وحشة؟

أن الصعايدة ما بيشربوش بيرة (عمرها ما حصلت، ده التار ولا العار يا ولد)؟

أن مصر مش كده مع أن الزقازيق كده؟

أن مجمع المدونات ده مؤامرة كبرى لتدمير الفضاء الرقمي المصري الحر المستقل و أن علامات الاستفهام من أسلحة الدمار الشامل؟

أن ويكي بيديا جزء من المؤامرة؟

أن الويندوز و الأوفيس سهل (حتى جرب تستخدمهم كده لمدة سنة من غير متستنجد بحد بيعرف أكتر منك)؟

أن الجواز لازمه حاجة كده تتراوح ما بين 100 ألف جنيه لنص مليون جنيه (واضح أن أنا و منال عايشين في الحرام، لكن أموت و أفتكر اتكلفنا 500 جنيه و ربع ليه بقى)؟

أن محدش بياكلها بالساهل؟

أن davinci code كتاب كويس؟

أن عمارة يعقوبيان كتاب كويس؟

أن المدونات المصرية ظاهرة خطيرة و جبارة و هزت الكون هز (تلاقيكي بس كنتي نايمة)؟

أن الصحفيين شغلتهم نشر الحقيقة (يا راجل قول كلام غير ده)؟

أن شركة المرعبين المحدودة بيعلم البذاءة؟

أن شركة المرعبين المحدودة السبب ورا التعذيب في أبو غريب (و قبل أبو غريب أكيد كان قصة أمنا الغولة)؟

أن الدنيا غرورة و عجصة؟

أن أنا غالبااااااااان؟

أن أنا وصلت لتفسير علمي للي أحنا فيه؟