Manal and Alaa's bit bucket free speech from the bletches

ايه يا عم أحمد أنا مبسوط من المناقشة يا أخي و مش محتاجة تذكير بمساحة الاتفاق و اعتذارات و كلام من ده. و بعدين أنت بتلعب دور مهم دلوقتي، بتحاول تفكك مسلمات سياسية، حد كان استجرى يتناقش في مدى جدوى التظاهر على المواضيع المقدسة قبل كده؟

بخصوص وجهات النظر المتباينة عن الاحتلال، ردي فوق مكتوب بافتراض أن أغلب الجماهير المصرية اللي مهتمة و لو اهتماما طفيف بالسياسة طيف مواقفها أضيق من طيف مواقف العالم و انحيازها ضد اسرائيل أعمق، يعني أشك أن فيه أعداد غفيرة من المصريين هيكون رأيها زي الراجل الانجليزي اللي أنت بتقول عنه، و بالتالى اخترت تجاهل الناس اللي أﻻائها كده.

خد بالك ده حكم جزافي على الرأي العام في مصر، بالحدس كده و مش مبني على أي مشاهدات احصائية و لا حاجة. ممكن أكون غلطان جدا، و ممكن يكون مش مفروض نتجاهل الآراء الأخرى دي.

اشعال المعركة ولا لأ ده مش بايدينا ولا المفروض يكون قرارنا، ده قرار الشعب الفلسطيني، أحنا كل اللي بنقدمه تضامن، و لو نطول مجموعة قرارات سياسية يكون فيه درجة من الاجماع على أهميتها من قبل الفلسطينيين (زي العالم ما قاطع جنوب أفريقيا اقتصادية، خد بالك قاطع مش حاصر).

بالنسبة لدور الحكومة في تشجيع مظاهرات الحرب، الحكومة فعلا شجعت مظاهرات 2000 و 2001 و بعدين ضربتها بشدة و اتقتل فيها طلبة، تجاهلت اللجنة الشعبية و استخدمتها اعلاميا ساعات و بعدين رجعت هاجمتها و اعتقلت فريد زهران.

أما في 2003 الحكومة خدت موقف معادي للمظاهرات من الأول تماما، و قمعت المظاهرات بعنف شديد (و كان أول ظهور لفرق الكاراتيه)، و رفضت تنفيذ حكم قضائي بتصريح لمظاهرة حاشدة، و اعتقلت مئات و فيه ناس مثلت قدام محكمة كمان (قضية الاشتراكيين الثوريين مثلا).

فلا يمكن اعتبار أن الحكومة وافقت على 2003، كل الشواهد بتقول عكس ده.

مش ده المهم، المهم أن في 2001 الجماهير عبرت عن سخط من دور الحكومة المتخاذل، و في 2003 هتفوا ضد مبارك و عن الأسعار و هاجموا مقر الحزب الوطني.

خد بالك الجماهير الغير مسيسة هي اللي عملت ده، كل من كان ليه في السياسة كان ظابت نفسه على العراق، و محدش كان تصور أننا ينفع نجيب سيرة مبارك أبدا.

طبعا حتة أنا كمواطن ميفرقش معايا مانفستو كفاية دي معاك كل الحق فيها، أنا كنت بشرح أهمية المظاهرة بالنسبة للحركة، لكن لازم يكون في اجابة على سؤوال أهمية المشاركة بالنسبة للفرد مننا ايه، و السؤال ده مهم لأنه على أساسه هتبني الدعوة و الدعاية و البيان و اللافتات و كل الكلام ده.

معنديش اجابة بما أن الفكرة مش فكرتي أصلا، و شكرا أنك فكرتنا أن في فرق ما بين السؤالين و الا كنا اكتفينا باجابة واحدة.

يفيدني ايه أن ناشطين محترمين يعملوا معرفش ايه دي جاوبنا عليها و قلنا ليه الناشطين دول مهتمين بالموضوع ده، أنا مش شايف أن المظاهرة دي هتأثر على جهود الناشكين و تقلل من خزين الطاقة اللي على أساسه هيتحركوا في قضايا داخلية (خصوصا و أن مفيش حراك مطروح على الساحة دلوقتي لحد بداية انتخابات النقابات العمالية).