Manal and Alaa's bit bucket

اليوم الخامس

صور

مظاهرة كفاية (ميدان الأوبرا)

ده الاختبار الحقيقي للحركة، مظاهرة كفاية اللي بعد الضرب على طول، بدأنا باشاعات أن في ناس عاوزه المظاهرة صامته، ده غير خبر أن النيابة أستدعت القيادات للتحقيق معاها.

المهم شيلنا اليفط و 180 ورقة عليهم مواقع المدونات و الحركات السياسية و غيره و أنطلقنا، أركن بعيد شيل اليفط و اتمشي، أمن كتير في طلعت حرب و بعدين ينقطع و يبان تاني عند ميدان الأوبرا.

سابوا للمظاهرة رصيف كبير (قدام مكتب مصر للطيران)، البوسترات عملت شغل جامد قوي، العدد عادي مش كبير (ناس قالت 300 ناس قالت 500). الحزب الوطني يا دوبك عرف يلم 15 قعدوا يصبعوا و يبعبصوا الهوا (كله من تأثير الفياجرا).

في الأول الكوردون كان فيه فتحة صغيرة، أنقضيت على الجمهور أوزع الورق و أتكلم معاهم، موظفين مصر للطيران خايفين يردوا أو حتى يبصوا في وشي، شوية واحد فيهم لان و بينتقدنا و يقول البلد ما جابتش غيره (و ماله، لما همه سبعين مليون هلف، ما تسيبونا ننقي هلف يحكمنا و يروح هو يدور على بلد تستاهله)، المهم بنتحاور راح زميل ليه زقوا و قالي أمشي من هنا، عاوز تهتف أهتف هناك لكن سيبنا في حالنا، طبعا الناس شاطت و اتخانقت معاه (الواحد مش محتاج مباحث اليومين دوا، في ناس متطوعين، يعني يخالفني ماشي، لكن بيسكتني و يهش اللي بيتكلم معايا؟ حد فسرها و قالك مبارك استنسخله مليون من نفسه عشان يضمن أن المربوط ينضرب).

طبعا الناس لقت المساحة كبيرة ابتدت تتحرك جواها، راح الأمن قافل الكوردون، كان في ناس كتير أتجمعت جوه مجرد بتتمشي، قالوا للضابط عاوزين نمشي شخط و مد ايده، طلعنا أحنا جدعان و ابتدينا نتخانق مع الضابط عشان يمشي الناس، معجبوش حد فينا جه يضرب رحنا ملطشينله و ندهما على الكاميرات.

الخول وقف ورا العساكر و قعد يشتم و يقول لو راجل تعالالي، يا جبان يا أبن الجبانة أنا اللي أجيلك و أنت حواليك ألفين عسكرى؟ المهم عملنا فيها بشاوات و قعدنا نسأل عن أسمه عشان بلاغ النيابة، جه لواء هشه و فتح للناس الكوردون.

أتنين على كراسي عجل مشاركينا المرة دي، البطل اللي كسر الكوردون يوم عابدين و وجه جديد، اتصاحبنا و رجعت تاني أحاور الجمهور، ناس كتير معانا بس بتتعامل على أن الرفض و العصيان فرض كفاية (حلوة فرض كفاية دي)، المهم أننا بنتكلم، راجل جميل قعد يحكيلي حواديت فساد تقشعر و حكيتله حواديت تعذيب عشان مأتقشعرش لوحدي، قابلت حد من العريش أول مرة ينزل مظاهرة، شاورتله على محامين حقوق الانسان عشان ياخد نمرهم حد عارف هيلموه امتى و يعذبوه، كل ما حد يشكي أن أساتذة الجامعة كلهم، أو المحامين كلهم، أو الصحفيين كلهم، أو الدكاترة كلهم فاسدين أطلعله ناس مننا و أعرفه بيهم، دول عينة من شرفاء بلدكم و صدقوني في منهم كتير.

الناس جت تتشعبط على السور الحديد العساكر زقتهم، فورا ابتدى العنف، رميت نفسي في النص و حشت، خلاص هديت تماما و مبقيتش عاوز أمسك ضابط أديله في بضانه بالشلوت، يمكن عشان اللواء بتاعي و نبيل العزبي بطلوا يظهروا؟ يمكن عشان منال مش معايا و وعدتها أني هرجع صاغ سليم؟

غلست على بتوع الدستور شوية عشان ماحطوش أحداث يوم السبت على الصفحة الأولى.

بعد ساعتين انفضت المظاهرة، الأمن متنكش و ما قعدش يقولك واحد واحد و اتنين اتنين، الشباب قالوا في سرية نفاجئهم و نطلع على طلعت حرب، و ماله.

على ما وصلنا طلعت حرب كان الموضوع انفض، مش عارف بقي الأمن فضها ولا الناس تعبت ولا ايه.

خمس أيام ورا بعض مشحونين، يوم 25 مايو و يوم 30 يوليو ما كانوش أيام سودة دي كانت أيام ولادة، من يومها و أنا حر.

منيش من مريدي الشيخ امام و بتضايق قوى أننا مش لاقيين غيره نغنيله في تحركاتنا، الراجل قدم كتير بس لازم أصوات جديدة، مع ذلك من يوم السبت و أنا بغني أتجمع العشاق في سجن القلعة أتجمع العشاق في باب الخلق و الشمس غنوة من الزنازن طالعة مين اللي يقدر ساعة يحبس مصر اتجمع العشاق في الزنزانة مهما يطول السجن مهما القهر مهما يزيد الفجر من السجانة مين اللي يقدر ساعة يحبس مصر

حتي لو محققناش حاجة يكفيني أننا قمنا بالفرض نيابة عنكم جميعا

اقرأ

• اليوم الأول
• اليوم الثاني
• اليوم الثالث
• اليوم الرابع
• اليوم الخامس