Manal and Alaa's bit bucket free speech from the bletches

توضيح عشان أنت فهمت بعض النقاط غلط

1. توماس مش قصده أنه الفنان لم يرسم الرسول، هو هنا بيعلق على كلمتي بأن الرسم لا يقصد الاسائة الى شخص الرسول، توماس هنا بيحلل ما رسمه الفنان و مفهوم أن ده تخيله أو تعبيره عن الرسول، لازم تاخد بالك أن رسم الرسول محرم على المسلمين فقط و بالتالي لو رسمه شخص غير مسلم بدون قصد الاسائة أو التشويه عداه العيب و يبقى ربنا يحاسبه اذا كان ده خطأ.
2. دي مسألة قرائات، أنا شفتها تتحمل الاتنين، و توماس شافها هالة لكن ربط بينها و بين تعبير دنماركي يعني ادعاء حسن الخلق عن كذب، أنا معرفش بصراحة لسه شايف أنها تتحمل الاتنين.
3. أظن المقصود هنا هو أن دول انتحاريين. لا أظن النية التشويه كما قرأتها بل هي نكتة هبلة مستلهمة من صورة المسلم التقليدية لدى الغرب (تفسير العمليات الانتحارية الشائع هناك هو أن الانتحاريين يرغبوا الذهاب الي الجنة و لقاء حور العين، طبعا مفيش حاجة مهينة أكتر من كده أصلا بس للأسف ده فهم شائع و مقبول).
4. في موضوع معاداة السامية، رغم كرهي لتأثير اللوبي الصهيوني و رغم صحة كلامك في الكيل بمكيالين لكن برضه هختلف معاك في الحتة دي، معاداة السامية مقصود بها تشويه شعوب و ليس أفراد أو مقدسات، تشويه و تجريح سيدنا موسى مقبول، ده مش معناه أنهم مبيفتروش على المسلمين و أن كل الرسومات شوهت الرسول فقط، أنا معاك في أن فيه عنصرية بغيضة في المجتمع عموما و في على الأقل واحدة من الرسومات لكن لازم تفهم الفرق بين الحالتين (حتى لو كان الفرق لا معنى له عندك، واضح جدا أن المسلمين قدرتهم على تحمل الاهانة و الظلم الموجه لهم مباشرة أوسع بكثير من قدرتهم على تحمل اهانة و تشويه الدين و رموزه و ده اختلاف جذري بين مجتمعنا و المجتمع الغربي و بين ردود فعل المسلمين و ردود فعل اليهود).
5. حقك طبعا تقاطع منتجاتهم، اعتراضي الوحيد هو أن تعاقب شعب بأكمله على أعمال قلة منه، خليك فاكر أن ده أكبر ظلم بيعملوه في المسلمين لما بيخلطوا المسلم المسالم بالمسلم اللي بيقاتل لتحرير بلده و أهله بالارهابي المخبول، لكن بعض الناس طرحت تصور براجماتي، قالت المقاطعة ليست لعقاب الشعب و لكن للضغط على الشعب حتى يحترمنا و يتدخل ضد الجريدة، و ده كلام له منطقه و أن كان بيشبه جدا منطق العقوبات الاقتصادية التي تفرضها الدول الكبرى بحجة أن كده الشعب هيثور و يضغط على الحكومة، خوفي أن ده و ان نجح في نزع اعتذار تكون نتيجته الوحيدة توسيع الفجوة بين شعوب الغرب و العالم الاسلامي.