Manal and Alaa's bit bucket

لو عاوز تعرف لجنتك الانتخابية فين أو أنت مسجل ولا لأ تقدر تزور

• قاعدة بيانات ناخبي امبابة
• قاعدة بيانات ناخبي الدقي
• قاعدة بيانات ناخبي مصر القديمة و عين الصيرة
• قاعدة بيانات ناخبي العطارين و اللبان - الاسكندرية

المفروض أن كل مرشح بيحصل على قائمة كاملة بالناخبين المسجلين في دايرته، و المفروض القائمة دي بتتنقح و تتجدد بشكل منتظم.

المفروض برضه أن مواليد 1982-1986 مسجلين تلقائيا.

اللي بيحصل أن المرشحين بيحصلوا على القوائم متأخر جدا و القوائم بتكون مترتبة ترتيب سيئ جدا و صعب التعامل معاها، و طبعا ولا بيتم تنقيحها ولا حاجة.

أما موضوع مواليد 1982-1986 فده مسخرة كل ما حد يسأل على تسجيله يطلعوله بسبب هو ليه مش مسجل، كمان مش واضح هل تسجيلك بيكون عند محل اقامتك كما هو مسجل في الرقم القومي و لا عند محل ميلادك ولا بين البينين.

اللي أنا مستغربه أن الناس بتشكي من القوائم لكن قليل جدا أما حد من المعارضة يوجع دماغه و يقعد ينقح و يدور في القوائم، ليه منظمات المجتمع المدني مش بتعمل مشروع كبير لرصد كل الميتين و التكرار و الانتهاكات الأخرى؟ ولا بيعملوا بس ملهوش فايدة؟ معرفش.

المهم المرة دي المرشحين حصلوا على القوائم في صورة رقمية و ده نظريا معناه أن هيسهل جدا البحث في القوائم، و دي حاجة تسمح للمرشح أنه يتصل بناخبيه و تسمح للناخب أن يعرف لجنته فين و هو مسجل ولا لأ و رقمه ايه و يوفر مشاوير و حرقة دم و كمان يسمح للمراقبين أنهم يدوروا على التجاوزات اللي في القوائم بشكل أسهل.

بس ده برضه نظريا، عمليا حكومتنا الالكترونية بذلت أقصى جهدها في أنها تديك ملفات كافكاوية (أو مباركية) عبثية يصعب جدا التعامل معاها.

لكن على مين، أحنا برضه ناس جامدة قوي، و اللي دخل الفضاء الرقمي بقى في متناول ايدينا مهما كترت محاولات الاستهبال، ممكن جدا بشوية هكرتة الواحد يحول الملفات الملعونة دي لقواعد بيانات محترمة ينفع التعامل معاها.

بعض مواقع الاخوان بتوفر خدمة البحث في القوائم، لكن معنديش فكرة ناويين يساعدوا المراقبين ولا لأ.

أنا بحاول ألم ملفات الناخبين من أي حتة عشان برضه أوفر خدمة البحث للناخب و كمان عشان أدي لأي حد (أيا كان مين) ملفات يمكن التعامل معاها بسهولة في برامج سطح المكتب (excel, access, openoffice, plain text, sql, whatever).

و بالفعل حملت قوائم دائرتي امبابة و الدقي في صورة يمكن البحث فيها

الموضوع بعد ما جهزت السكريبتات اللازمة مش بياخد مني أكتر من 10 دقائق فيا ريت أي حد يقدر يجيبلي ملفات الناخبين بتاعت باقي الدوائر يبعتلي ايميل على alaa@manalaa.net

لو تعرف مرشحين قوللهم على الموضوع ده.

و على فكرة ده مهم جدا لمواليد 1982-1986 بالذات فيا ريت تنشروا الخبر.

و برضه أكون سعيد لو حد يعرف مواقع تانية بتقدم خدمة مشابهة يبعت روابط في التعليقات.

قريبا هكتب تفاصيل تقنية عن الخطوات اللي اتبعتها عشان أجهز قواعد البيانات على مدونتي في eglug

لو عاوز تعرف لجنتك الانتخابية فين أو أنت مسجل ولا لأ تقدر تزور

• قاعدة بيانات ناخبي امبابة
• قاعدة بيانات ناخبي الدقي
• قاعدة بيانات ناخبي مصر القديمة و عين الصيرة
• قاعدة بيانات ناخبي العطارين و اللبان - الاسكندرية