Manal and Alaa's bit bucket free speech from the bletches

موضوع التحرش الجنسي مش الموضوع الوحيد اللي المدونات كان ليها السبق في نشره اليومين دول، ما يجرى حوالين انتخابات اتحاد الطلبة من عنف و بلطجة و تزوير و تعريص حكومي موثق بشكل جيد جدا على المدونات و بشهاات و صور و كالعادة الموضوع تاه في وسط أحداث ثانية رغم أهميته.

تحية للصحافة الشعبية اللي جايلنا من الجامعة، كان بودي أجمع الروابط كلها لكن للأسف مشغول جدا، لو حد عنده روابط يحطها هنا في التعليقات و محتاجين نفكر في حلول خلاقة زي الاتحاد الحر بتاع السنة اللي فاتت.

الزميل فوزي كتب تدوينة كويسة عن أحداث الاعتصام الأخير في جامعة القاهرة، التدوينة مركزة بدرجة كبيرة على نقد سلوك طلبة الأخوان لكنه في رأيي نقد بناء و كلام مهم مش مجرد ذعر غير منطقي.

و بمناسبة الكلام عن الصحافة الشعبية معرفش الناس واخدة بالها ولا لأ لكن عندنا تجربة لطيفة جدا في التعاون ما بين الصحافة الشعبية و الصحافة التقليدية بفضل كرم المصوريين الصحافيين المحترفين (و الموهوبين) عمرو عبد الله و ناصر نوري اللي بيوفروا صورهم للمدونين و النشطاء يستخدموها براحتهم، يا ريت يا جماعة لما حد يستخدم صورهم ينوه ليهم ده أقل واجب و تحية كبيرة ليهم.

حسام الحملاوي بيجمع صورهم في حسابه على فليكر لكن أحب أشوف مدونة خاصة لناصر و عمرو و كمان يا ريت يوثقوا كرمهم ده باستخدام رخصة مفتوحة زي creative commons مثلا.