ازاي ديليشوس

Web 2.0

من كام سنة كده في نفس وقت ظهور المدونات حصل نقلة في في تفكير المبرمجين تجاه الوب، نجح مجتمع البرمجيات الحرة/مفتوحة المصدر بالأساس و بعض شركات ما بعد الدوت كوم في تغيير ثقافة الوب و رجع الناس يتكلموا عن وب كأداة لتمكين البشر و وسيلة لاطلاق العنان لابداعهم. الطريقة الجديدة في التفكير و العمل دي نتج عنها شوية أفكار فلسفية أساسية و تكنولوجيات و best practices و خدمات اطلق عليهم مجتمعين Web 2.0. أو وب الاصدار الثاني.

التدوينة دي مش لشرح Web 2.0 لكن المهم نعرف شوية أفكار أو مبادئ أساسية تعتبر صميم وب 2.0 (خدي بالك أن ده أصلا موضوع خلافي تعريف web 2.0 اختلف عليه الناس و فيه ناس رافضة الكلمة أصلا)، قال ويكيبيديا:

a social phenomenon referring to an approach to creating and distributing Web content itself, characterised by open communication, decentralization of authority, freedom to share and re-use, and "the market as a conversation"

كلام جميل بالنسبة لي المهم في وب 2.0 هو التركيز على البشر مش المعلومات، الناس العادية مش الخبراء، المستخدم مش المبرمج ولا البرنامج ولا الشركة، لكن الفكرة الثورية خلف وب 2.0 هي أن في حالات كتير مجموع رأي عدد كبير من الغير خبراء قيمته أعلى من رأي عدد قليل من الخبراء، و لو مجموع الرأي ده يشمل الخبير و اللي مش خبير و اللي في النص يبقى خير و بركة.

فكرة بسيطة جدا و تبدوا لناس كتير في الأول مرفوضة، لكن دي الفكرة اللي مبني عليها حاجات كتير ناجحة زي جووجل، و ويكيبيديا، و الذكاء الصناعي الواعي بذاته 20Q و مجتمع البرمجيات الحرة/مفتوحة المصدر، و الصحافة الشعبية، و الديمقراطية. و منها ظهرت فكرة الfolksonomy أو التصنيف الشعبي.

Folksonomy

من زمان و أحنا قاعدين ننظم و نصنف البيانات و المعلومات و المحتوى بجميع أنواعه، و فيه علوم للتصنيف (من أول تصنيف الكائنات الحية لحد علوم المكتبات) و خبراء تصنيف، و مشاريع ضخمة كل المرجو منها هو تصنيف حاجات. الفكرة الأساسية وراء التصنيف كانت أنك تجيب خبير و يقعد يشتغل زمن طويل لحد ما يطلع بنظام للتصنيف و قواعد ليه (ودي بتتسمى taxonomy) و بعدها كل حاجة يبقى معروف مكانها فين بالظبط، لو النظام مبني بشكل كويس يبقى أي حد مش بس الخبير يقدر يحط أي حاجة في مطرحها الصحيح (أرفف مكتبة عامة مثلا). و بعدين تطورت الأمور و حاولنا نعمل نظم تصنيف فيها مساحة لمستجدات (مثلا يفترض نظام تصنيف الكائنات الحية أنه يمكن يتسع لأي فصائل جديدة من غير تغيير البنية الأساسية بتاعته)، و بعدين عملنا نظم تصنيف يمكن للشيئ الواحد أنه يكون له أكتر من مكان فيها (خصوصا بعد ما أكتشفنا أن موضوع ذكر العنصر في مكان واحد فقط مرتبطة باعتبارات فيزيائية غير قائمة في السياق الرقمي)، و هكذا.

أي متابع للموضوع ده هيلاقي أنه دايما بيفشل على مستويات رهيبة لكن بيؤدي خدمة مهمة و بيبسط الدنيا و بالتالي استمر (أبسط مثال هو قنديل البحر الشهير بالزجاجة الزرقاء، ده عبارة عن 4 فصائل مختلفة تعيش في تكامل و بالتالي تم تصنيف كل فصيلة لوحدها و بعدين خلق فصيلة خامسة للاشارة للميكانزم كله على بعضه)، لكن لما جينا ننقل ده للوب بدأت المشاكل تتفاقم، أولا بقينا عايزين أنظمة لتصنيف كل حاجة و أي حاجة، و بقينا عايزين نربط ما بين أنظمة تصنيف مختلفة، و بقينا عايزين كل من هب و دب يعرف يصنف (زي مثلا تصنيف التدوينات في مدونتك)، و العملية ضربت خالص.

وب 2.0 قدمت حل جزئي اسمه Folksonomy، ده مصطلح ظهر بقاله سنتين كده ولا حاجة و دي دمج لكلمة Taxonomy (نظام التصنيف) و Folk (شعبي فطري)، يبقى Folksonomy هو التصنيف الشعبي الفطري. و المقصود هو أنك متجيبش خبير ولا حاجة و متعملش نظام تصنيف مسبق، مش بس كده انت تبطل تفكر في التصنيف على أنه وضع العنصر في مكانه الصحيح، فكر في التصنيف كأنه مجموعة بيانات اضافية بتشبكها على العنصر (كأنك عملت عليه علامة أو وسمته بوسم يعني).

ازاي؟ بسيطة، أنت هتتيح لأي حد أنه يصنف أي حاجة و بأي طريقة تعجبها، و أي عدد من التصنيفات، عملية التصنيف هنا بيتقال عليها tagging (يضع وسم أو يوسم)، تخيل أن كل واحد فينا ماشي بملصقات بيضاء صغيرة و قلم ماركر، كل ما تشوف حاجة تعجبك تلزق عليها ستيكارات و تكتب أي تصنيف يخطر على بالك، يعني أنا ماشي لقيت عربية رحت ملزق عليها (غالي، مضر للبيئة، وسيلة انتقال، يستهلك بترول، معدني، أحمر، هوندا، وحشة)، يجي حد تاني يشوف نفس العربية و يلزق (سعر معقول، جامدة فشخ، تحكم عالي، أحمر، هوندا، فيتيس آلي، مش عارف كام cc)، و هكذا لو عدا على العربية دي ألف واحدة و كلهم وسموها بوسوماتهم الخاصة هنقدر نعرف معلومات كتيرة جدا عن العربية و عن البشر اللي عدوا كمان.

يعني مثلا من المؤكد أن العربية لونها أحمر و أنها هوندا و كل الحقائق دي هتبان على طول لأن التصنيف المبني على الحقائق هيتكرر كتير و غالبا مش هيبقى فيه اختلاف، لكن هنعرف أن سعر العربية و تأثيرها السلبي على البيئة من الأمور الخلافية أو تعتمد على وجهة نظر مثلا، طيب لو عربية صنفها 10 على أنها ضارة بالبيئة و عربية تانية صنفها 700 على أنها ضارة بالبيئة يبقى في معلومة جديدة لأن المسألة ما بقيتش محدودة على الناس اللي شايفين أن العربيات كلها ضارة بالبيئة أكيد العربية التانية دي ضررها كبير (SUV مثلا)، طيب لو أقدر كمان أعرف مين اللي صنف ازاي مش يمكن أنا هثق في حد بعينه أكتر؟

ممكن كمان الوصول لمعلومات أكتر عن طريق أننا نرصد العلاقات ما بين التصنيفات المختلفة، يعني مثلا نبص على ايه أكتر تصنيف اتكرر مع مضر للبيئة و نشوف هل العربيات اتكررت أكتر ولا المصانع، و نقدر نعرف مدى ارتباط مفاهيم زي حرية التعبير بالديمقراطية عن طريق أننا نشوف نسبة تكرارهم مع بعض الخ.

لكن قبل ده كله ده تصنيف برضه، أقدر أقول وريني كل وسائل الانتقال، أقدر أقول وريني كل وسائل الانتقال اللي لونها أحمر و هكذا.

مثال كويس قوي لاستخدام الfolksonomy هو خدمة flickr لنشر الصور، التصنيف في flickr شعبي و عندهم أدوات كتير بتحلل التصنيف عشان تسهل عليك تتفرج على الصور.

Social Bookmarking

الBookmarking أو وضع العلامات هو الوسيلة الأساسية اللي بنفتكر بيها الأماكن المهمة بالنسبة لنا على وب (بتوع مايكروسوفت اللي عندهم نقص شديد في التفكير النقدي بيستخدموا كلمة المفضلة بدل من العلامة على أساس أن عموم الناس عمرها ما قرأت كتاب و علمت في صفحاته و عمرها ما هتعوز تفتكر حاجة وحشة)، قبل جووجل كانت العلامات دي هي الطريقة الوحيدة اللي بيها ممكن نعمل خريطة لوب و نحولها لحاجة مفهومة و يسهل الحركة فيها.

أما Social Bookmarking فمقصود بيه بكل بساطة أنك تشارك الناس في الbookmarks بتاعتك و أنك تتفرج على الBookmark بتاعتهم. نسميه العلامات التشاركية ولا حاجة مجعلصة كده عشان نبان مثقفين؟.

طبعا مزايا الSocial Bookmarking مش بس في المشاركة مجرد أن الbookmarks بتاعتك على وب معناه أنك ممكن توصلها من أي مكان حتى لو مش جهازك.

لكن الطفرة الحقيقية في Social Bookmarking ظهرت لما دمج معاها فكرة التصنيف الشعبي، أنت مش بس هتنشر العلامات بتاعتك على وب، أنت كمان هتوسمها بأي tags تخطر في بالك. و قوة الموضوع كله في قدرتك على أنك تلعب بالوسوم اللي عملتها و اللي عملها غيرك.

يعني تقدر تسأل ايه الروابط اللي عندي اللي بتتكلم عن الطبيخ و ممكن تقول ايه الروابط اللي عندي اللي بتتكلم عن الهند، و ممكن تقول ايه الروابط اللي بتتكلم عن الاتنين في نفس الوقت، و بدل ما تدور في روابطك أنت بس تقدر تقول ايه روابط الطبيخ و الهند عند كل الناس.

و تقدر تتابع ايه المواضيع اللي الناس مهتمة بيها اليومين دول و ايه العلاقات ما بين المواضيع و الناس بتشوف الدنيا و تصنفها ازاي و تقدر طبعا تتابع معارفك و روابطهم.

del.icio.us

يااااه أخيرا وصلنا لموضوع التدوينة :-)

del.icio.us هي أشهر خدمة Social Bookmarking على وب و أول واحدة تعتمد على التصنيف الشعبي (بل هي المثال الكلاسيكي للتصنيف الشعبي)، و دي خدمة بسيطة جدا، أنت بتزور موقعهم و تعمل تسجيل و بعدها تقدر تضيف أي مواقع عندهم و تكتب وصف ملخص لكل رابط و طبعا توسمه عليه بأي وسوم تيجي في بالك.

و لتسهيل الأمور أكتر فيه extension لفايرفوكس بيخليك مش محتاج تزور الموقع بتاع del.icio.us عشان تضيف رابط، كل اللي هتعمله أنك تدوس على زرار الماوس اليمين و تختار del.icio.us->post current page و تملأ الصندوق الحواري اللي هيطلعلك. و مش بس كده كمان الصندوق الحواري هيقولك كل الtags اللي أنت استخدمتها قبل كده و كمان هيشوف لو الرابط ده موجود على del.icio.us عن طريق مستخدمين تانين غيرك و يقولك الوسوم اللي استخدموها لما صنفوا الرابط.

بعد كده بقى تقدر تشوف الروابط بتاعتك أو بتاعت أصدقائك، مثلا

• روابط علاء
• روابط مصطفي
• روابط صاحب الأشجار
• روابط محمد سمير
• روابط يوسف أسعد
• روابط اخناتون الثاني
• أي مدون تاني بيستخدم del.icio.us يا ريت يقولنا عشان يمكن نبقي نعمل مجمع مخصوص للتلقيمات بتاعت علاماتكم.

و تقدر تشوف روابط أي تصنيف

• روابط عن مصر
• روابط عن السياسة

و تقدر تشوف روابط في أكتر من تصنيف

• روابط عن السياسة في مصر
• روابط عن تاريخ مصر

و طبعا ممكن نقول وريني روابط السياسة في مصر بتاعت علاء فقط.

ركزي كويس في شكل العنوان (url) عشان دي الطريقة اللي الواحد بيتعامل بيها مع del.icio.us.

و ممكن كمان تتابع الروابط اللي ليها شعبية كبيرة (عدد كبير من الناس علم عليها) أو تتابع الوسوم اللي ليها شعبية كبيرة (عدد كبير من الناس استخدمها لوسم روابط).

و كل الحاجات دي الواحد ممكن يشوفها في صورة تلقيمة RSS كمان و يتابعها على موقعه عن طريق مجمع زي مصطفي ما بيعمل أو يتابعها عن طريق مجمع شغال على جهازه.

مش بس كده، زي أغلب خدمات وب 2.0 موقع del.icio.us موفر أدوات للمبرمجين يقدروا عن طريقها يبرمجوا حاجات جديدة مبنية على del.icio.us، مثلا تقدر تشوف خريطة لحالتي الذهنية الحالية، دي عبارة عن سحابة تصنيفات (tag cloud) معتمدة على بيانات del.icio.us بتاعتي، العلامات الأكثر استخداما حجمها أكبر و العلامات المرتبطة ببعض (بتظهر مع بعض كتير) قريبة من بعض.

و كمان حاجة مشابهة لكن باستخدام الصور، و دي في الحقيقة عبارة عن خلطبيطة أو mashup لأنها بتستخدم خدمتين Web 2.0، بتجيب التصنيفات من del.icio.us و الصور من Google Images.

أو محرك بحثي للفرجة على روابط del.icio.us.

ده مش كل حاجة، del.icio.us عنده مزايا تانية و فيه مئات من الأدوات و الخدمات اللي اتبنت عليه بس كده عندكم فكرة كويسة عنه.

المهم بقى أننا ممكن نستخدم del.icio.us مع بعض لما نعوز نعمل عمل جماعي معتمد على المدونات، يعني مثلا لما عملنا بيان المدونين بعد أحداث محرم بيك كنا عايزين نلم روابط لكل التدوينات اللي اتكلمت عن العلاقات ما بين المسلمين و المسيحيين في مصر، و بعد يوم الأربعاء الأسود جمعنا التدوينات اللي عن الاستفتاء و العنف اللي حصل و عملنا منها وثيقة حتى لا ننسى، و دلوقت بنتكلم عن تجميع كل تغطية المدونات للانتخابات البرلمانية، و كمان فيه ناس اتكلمت عن كتاب يبقى فيه أحسن تدوينات الخ.

كل الحاجات دي بتبدأ بتجميع روابط، و التنسيق فيها ممكن يكون صعب، لكن لو استخدمنا del.icio.us و اتفقنا على tag موحد نقدر نعمل نجمع الروابط بسهولة، يعني مثلا أحنا فعلا بدأنا بتجميع روابط الانتخابات البرلمانية تحت تصنيف EgyptianParliamentaryElections2005

يعني من الأخر الموضوع مقلب و أنا عايز أدبسكم عشان تشاركونا في تجميع التدوينات عشان نعمل وثيقة المدونين عن الانتخابات.

لكن ممكن استخدام del.icio.us بوسائل تانية لمتابعة المدونات، ممكن مثلا تعلم على أي تدوينة تعجبك عشان تساعد اللي مش قادر يتابع المدونات مثلا، أو تعلم على التدوينات اللي أنت سيبت فيها تعليق و بكده تقدر تتابع تلعيقاتك و الردود اللي جت عليها. و هكذا بقى شغلوا خيالكم.