Manal and Alaa's bit bucket free speech from the bletches

أول مرة أسمع عن تفرقة مناوئة للحرب ولا الاحتلال دي، هي كانت حرب أهلية؟ ولا حرب بتمارسها قوتين على أرض تالتة؟ يعني أبقة ضد حرب احتلال من غير ما أخد صف اللي احتلت أرضه؟

عموما لما أستخدمت كلمة ضد الحرب كنت بتكلم عن العراق ﻷاني كنت بشير لمظاهرات مارس 2003 اللي كانت في أول الحرب قبل ما العراق يبقى محتل، و واضح جدا أن المقصود مظاهرة ضد الاحتلال، و ان كانت مناسبة المظاهرة هي اجتياح غزة الأخير ده ميمنعش أن الموقف رافض للاحتلال عموما مش للهجمة دي فقط.

موضوع الضغط على الحكومة عشان موقف، ركز شوية علاقتنا باسرائيل مش متوقفة على السفير و بس، في علاقات تجارية مثلا، و فيه غاز بنبيعهلهم، و فيه كمان غير التمثيل الديبلوماسي أن مبارك كل يومين يقابل سياسيين اسرائيليين و يتصوروا و هما بيحضنوا بعض و يضحكوا مع بعض.

ده غير أن فيه مواقف داعمة للفلسطينيين ممكن تتاخد، أبسطها تخفيف الحصار على غزة عن طريق فتح معبر رفح للتجارة و لتنقل المدنيين.

أما موضوع لو الحركات الوطنية، بغض النظر عن تحليلك دي تبقى مصيبة ولا لأ أنا كنت بحكيلك عن حاجة حصلت فعلا، اللي حصل أن مظاهرات 2000-2001 و اللجنة الشعبية و مظاهرات 2003 هي اللي انبثق عنها التكتلات اللي موجودة دلوقتي، دلوقتي مطالب الديمقراطية و استقلال القضاء و وقف التعذيب و مكافحة الفساد طالب بقت الحاجة اللي الناس بتتجمع عليها، لكن ده ميغيرش التاريخ.

و بعدين موضوع أن المشاركة في المظاهرات بتكون أكبر لما يبقى الموضوع عن العراق أو فلسطين دي برضه مشاهدة لواقع أحنا عايشينه بغض النظر عن عاجبنا ولا لأ، و لو عايز أقنع ناس أكتر أنهم يشاركوا في فعاليات على مواضيع محلية لازم أقابلهم الأول و مش شايف ايه المانع أن واحدة من الأماكن اللي أقابلهم فيها تكون في مظاهرة ضد الاحتلال (و على فكرة ده مش موضوع خاص بمصر بس، حركات مناهضة حرب العراق في الغرب قدرت تعمل مظاهرات ضخمة جدا و جامعة لتيارات سياسية كتيرة جدا أكبر بكتير من أى مظاهرة على مطالب محلية).

لو فيه 1000 حاجة بتجمع الناس يبقى دور حركات التغيير أنها تمسك في الحاجات اللي متوافقة مع مبادئها و أهدافها و تشتغل عليها، يعني لو الحشيش متوافق مع مبادئ و أهداف الحركة يبقى المفروض نعمل مظاهرة حشيش، اللي حاصل أن الحشيش (و أن كنت أشك في أنه عنصر جامع للدرجة) مش متوافق و معارضة الاحتلال و التدخل العسكري الأجنبي متوافق. لو أنت متابع هتلاحظ أن فيه شغل اتعمل على قضايا جامعة زي البطالة و العبارة، و فيه شغل اتعمل على مناسبات جامعة زي عيد الأم.

مفهمتش الحتة اللي عن أني بتكلم زي السياسيين دي معناها ايه بالظبط، الكلام بسيط، لو الحركات الجامعة اللي موجودة دلوقتي و التيارات المختلفة اللي موجودة دلوقتي كلها عندها مواقف رافضو للكيان الصهيوني و احتلال الأراضي الفلسطينية، و لو ده موضوع يهم أعداد كبيرة من الجماهير المصرية، يبقى مهم أن ده يكون من ضمن المواضيع اللي الحركات و التيارات السياسية بتشتغل عليها حتى لو كانت غير قادرة على تحقيق مكتسبات في اللحظة دي.

فكر فيها كده، لو فيه مجموعة ناس تعرف بعض و بتتقابل بشكل دوري و تتكلم كتير، و المجموعة دي كلها عندها موضوع بيهمها جدا مش مسيرهم هيتكلموا فيه مع بعض؟ في حركات و تيارات سياسية بتخاطب جماهير عن طريق مظاهرات و مؤتمرات و أدبيات و اعلام و غيره و طبيعي جدا لما يبقى موضوع احتلال فلسطين يهم الحركات و التيارات و يهم جمهورها أنه من حين لآخر يتفتح الكلام على الموضوع ده.