Manal and Alaa's bit bucket free speech from the bletches

كلامك مظبوط ميه في الميه يا علاء .. الموضوع تنظيمي اكتر منه اي حاجه تانيه .. اللهم لا شماته .. لكن انا قلت زمان .. ان حركة المعارضه مش مظاهرات و بس.. المعارضه لازم يكون ليها هدف .. مش لاننا اتحرمنا كتير من حق الزعيق .. يبقى نملا الدنيا صريخ و ننسى احنا بنصرخ ليه ..

كان نفسي الحركه الجديده .. الناس المهتمين بالسياسه بس غير المنتمين لاحزاب و دول كتار .. او حتى المنتمين لاحزاب و لكن التغيير اهم عندهم من الايديولوجيات ( بدل الوساخه اللي حصلت في الجبهة و مع الاخوان ) .. كان نفسي ان دول يجمعوا على مرشحين محددين انشالله في دواير معينه .. او ع الاقل كانوا يدعموا المرشحين المحترمين في الاحزاب .. و ساعتها التظاهر كان يبقى ليه هدف

المعارضه استفادت ايه من حركة الشباب و النخبه الاخيره ؟؟ و لا كرسي من العشرين حزب ؟؟؟!!!! احا فعلا

كفايه و احزاب المظاهرات كانت بتستخدم الحركه ليه ؟؟؟ عشان يبانوا ثوريين ؟؟؟ و لا عشان يظهروا قدام الكاميرات باليفط بتاعتهم ؟؟ و بعد ما المظاهره تخلص يرجعوا يشتموا في بعض.. و يحسبوا ازاي حايخدوا كراسي اكتر من التانيين ..

مبارك رمى العضمه للمعارضه و هم قتلوا بعض عليها .. و في النهايه الوطني و الاخوان اكلوا الكعكه كلها ..

..

الحكومه حققت غرضها الذكي . بالسماح لينا كشباب للتنفيس.. عايزيين يصرخوا و يصوتوا شويه يصرخوا .. هم حايعملوا ايه دلوقتي؟؟

..

اللي غايظني ان الحركه كلها بقت حركة رد فعل .. يعني بنستنى نتيجة الانتخابات الرئاسيه عشان نعمل مظاهره . بنستنى الريس يرشح نفسه و نعمل مظاهره .. بقت حركة التغيير الشبابيه ع الاخص في موقع الدفاع على طول .. او بالاصح في الموقع السلبي من المعادله ..

كان نفسي نصنع الاحداث مش نتجاوب معاها ..

و بدل ما نصرخ و نشتم و نندد و نشجب و ننادي بسقوط فلان او علان .. نخلينا عمليين .. و نعمل حاجات تساعد في تحقيق اهدافنا ع الارض

ده لو كان في اهداف اساسا غير الزعيق و الشخط و النطر

بس فالحين نشتكي من التزوير و الوساخه و البلطجه .. طب ماكل ده متوقع و موجود .. و ما حدش تخيل ان الحكومه حاتطبطب علينا و تدينا كراسي بس عشان عملنا مظاهرتين ..

بدل مانشتكي من الوساخه نبص الاول عملنا ايه عشان نوقفها

.. احنا محتاجين كشف حساب باللي حصل من اول الحركه لحد دلوقتي.. و محتاجين كمان نحدد اهدافنا .. احنا عايزيين ايه بالظبط..؟؟

.. و ماحدش بقى يقوللي التحريك لمجرد التحريك .. خلاص ده كان كلام ممكن من كام شهر ..دلوقتي حتى الاخوان استغلوا التحريك و نطوا على تيارات انا زعلان انها لسه بتتحرك بس في القاع ..

معلش بس انا مبقوق