Manal and Alaa's bit bucket

صلي على النبي يا ست نعامة

العصافير في الغابة بتاعتنا رغاية شوية و بتنم كتير، و دي حاجة بيفوتوها لبعض لأن كلهم رغايين، لكن باقي الحيوانات لما بتعرف أن العصافير بتنم عليها بتزعل.

قامت العصافير اتفقت أنها ما تنمش الا لما تبقى واقفة على شجر عالي بس، و كده الحيوانات ما تسمعش بيقولوا ايه. و محدش يزعل.

لكن المشكلة أن الأسد ملك الغابة (اللي كان أصله جربوع بس سبحان الله صار أسد) غلس و بيحشر نفسه في كل حاجة، و كان بيحب يسمع نم العصافير عشان يعرف كل أسرار أهل الغابة، طبعا لما العصافير قررت تزقزق من فوق الشجر بس الأسد قفش، و اتفق مع الزرافة أنها تستخبي و تتسحب ببطء و ترفع رأسها فوووق قريب من الشجرة و تسمع نم العصافير و تبلغه.

الزرافة غشيمة حبتين، و عشان تضمن ما تنساش اللي بيتقال بتقعد تردده، العصافير سمعتها و هرشت الموضوع.

العصافير قعدت تشتكي، لفوا على الغابة كلها و بلغوا الحيوانات، قالولهم انتم كنتوا بتزعلوا مننا لمجرد أننا بندردش و نجيب سيرتكم، انما الأسد ده قاعد ينخور و يدور و عايز يعرف أسرار الغابة كلها، الكلام وصل للزرافة و الزرافة استهبلت و عملت أن هي اللي مزاجها تسمع و قالت و الله أنا ربنا خلقني رقبتي طويلة و اللي مش عاجبه ما يزقزقش.

العصافير قعدت تفكر في حل، ما هو مش ممكن هيسكتوا، يقضوا يومهم في ايه يعني غير قعدات النميمة؟ قعدوا يفكروا في حل، يفكروا في حل، و في الأخر قرروا أنهم يلخبطوا زقزقتهم و محدش يفهم الكلام غير اللي حافظ نشيد سري، فرق النوت اللي بيغنوها عن النوت الأصلية للنشيد السري هي زقزقة النم، و بكده محدش يفهم حاجة غير العصفور اللي حافظ النشيد.

الزرافة غشيمة بس مش على الأخر، قعدت تسمع زقزقة ملخبطة شوية لحد ما فهمت ايه اللي بيحصل، و فكرت أن الحل هو أنها تتابع العصافير الصغيرة اللي لسه في الحضانة، و تستنى لحد ما تسمعهم و هما بيتعلموا النشيد السري، و بكده تعرف العصافير بتقول ايه، بس برضه كانت غشيمة و قعدت تردد الكلام، و العصافير برضه هرشت.

المهم العصافير جابت البوم أحكم حكماء الطيور و عرضوا عليهم المشكلة، البوم قاللهم أنتوا محتاجين طريقة للخبطة الكلام أحسن عشان يبقى مفيش داعي للاتفاق على نشيد سري، و افتكس البوم لعبة معتمدة على الهارموني المعقد جدا بين نشيدين، و ألطف حاجة أن النشيدين دول ممكن يكونوا معروفين للكل، لأن فك الشفرة مش بس محتاج النشيدين ده كمان محتاج السلم و الكورد الأساسي بتاع أي نشيد منهم و دي بقى بتبقى معلومات سرية، و الأذكى بقى أن أي عصفور عايز ينم مع عصفور تاني في السر مش محتاج يشاركه في سلمه الموسيقي و كورده السري محتاج بس يشاركه في النشيد و كل عصفور هيستخدم سلمه الموسيقى و كورده في أنه يفك زقزقة العصفور التاني.

و بكده يبقى مهما الزراف اتخابص مش ممكن يفهم اللي بيتقال لأن مفيش عصفور محتاج يقول لأي حد السر بتاعه، كل اللي محتاجه أنه يسمع النشيد العلني و ده مش كفاية لفهم السيم بتاع العصافير.

قوم ايه، العصافير مخها صغير و مبتعرفش تفتكر الهارموني المعقدة، كل عصفور كتب السلم و الكورد السري بتاعه على ورقة شجر و قاللك لو ضاعت أو انسرقت مني الورقة دي نبقى نغير النشيد و نغير معاه السلم و الكورد السري و نبلغ كل العصافير بالتغيير ده.

و أنا بصفتي تنين بجناحات بيطير أقنعت العصافير أني طائر زيهم و انضميت لمجموعتهم و بقى عندي نشيد علني و سلم و كورد سري، بس الكلاب بتوع الأسد ضربوني مرة لما كنت أعزل و بوجيهي بايظ و مش عارف أعمل شعلة عشان أنفث نار و أدافع عن نفسي، و سرقوا مني الورقة بتاعت السلم و الكورد السري، و طبعا كان مفروض أبطل أستخدم النشيد بتاعي و أشوفلي نشيد جديد بس أنا مبعرفش ألحن لوحدي و كنت محتاج أعمل رحلة لشجرة العصافير بس ملقيتش وقت.

و من يومين بقى أبو منجل قفش علي و قاللي أنت كده مبوظ السيم اللي بيننا فضي نفسك و اطلع على الشجرة قوام قبل ما تخربها على كل الطيور، فعلا فضيت نفسي و طرت للعصافير و لحنولي نشيد جديد له سلم و كورد جداد فقلت أخطر الغابة كلها عشان تبطل تستخدم النشيد القديم اللي احتمال ابن اللبوة يكون فاقسه.

و ده يا ست نعامة الموضوع كله، و بما أن النظام ماشس مظبوط خالص أنا شايف أن ممكن الطيور اللي مش بتطير زيك تستخدمه برضه، المشكلة الوحيدة أن الوصول للفروع العالية في الشجرة صعب شوية، بس معلش هو مجهود هيتعمل مرة واحدة بس.

أما العبرة الأخلاقية من القصة دي أن البوم أسيادكم في الغابة و الكل معتمد عليهم فعاملوهم باحترام لحسن تلوصوا. و أنا شايف كل طير يجدد عشه و أحسنله يبني بالتنقيط زي البوم البوم ما بيعمل.