الي الأخوة الفطاحل البواسل، الرجالة الشديدة قوي المؤمنة قوي الغيورة قوي قوي قوي قوي

المرجلة مش هز كتاف

و الايمان مش فتح كتاب

و الحرية مش بالقسط

و بعد،

أنا مش فاهم ليه كل واحد يشوف سلوك مش عاجبه يقوم يختزل الحرية كلها فيه

يا سادتي الحرية التي نريد حرية واسعة، تسمح بطيف كبير من السلوكيات والاراء و تضمن العدل و الأمان لكل الناس

أيوه أحنا بنطالب بحرية الالحاد و الكفر و الايمان بأي عقيدة مهما كانت، أحنا مش عايزين حرية الاختيار من متعدد في الأديان، عايزين زي ما نبقى أحرار نكفر يبقى الناس أحرار تتدين، و محدش يعتقل عشان ربى دقنه و تردد على الجامع كتير. و مفيش واحدة لما تسلم البوليس يرجعها لأهلها و يلغي اسلامها.

الحرية التي نريد هي حرية أن تنتمي لأي جماعة مسالمة من غير ملاحقة أمنية، أن تشكل أحزاب تعبر عنك، أن تصدر صحف تعبر عنك و تكشف الحقيقة من وجهة نظرك. أنك لما تعبر عن رأيك لما تقترح الأفضل لمستقبلك و مستقبل أولادك محدش يتعرض لك بالتعذيب و الاعتقال.

في وسط الهيصة بتاعت انتخابات مجلس الشعب انتخابات اتحاد الطلبة بجامعة القاهرة شغالة و محدش واخد باله.

كعادة كلاب الأمن و دلاديل السلطة قوائم المرشحين اتشطب منها كل من لم يعرف عنه أنه مباحث، و دي طبعا خبطت طلبة الأخوان المسلمين أكتر من أي حد تاني.

لكن شباب جامعة القاهرة طلعوا أجدع من أي حركة معارضة و قرروا يتجاهلوا القرارات التعسفية و عملوا انتخابات بديلة سموها انتخابات اتحاد الطلبة الحر.

أنا مبهور من الشجاعة و الابداع، أهم دول اسلاميين الواحد يفتخر بيهم و ينتخبهم مش البلاوى بتاعت مجلس الشعب.

يا نهار مسخرة

كل التزوير ده و المشاركة 10%

بس أنا شايف أن المشاركة الضعيفة جدا جدا جدا جدا دي مش معناها أن الناس مش هاممها

أولا أغلب الناس مش مسجلة و لأسباب الحكومة مسئولة عنها بدرجة عالية

و كمان نسبة لا يعلمها أحد من الجداول يا أما مزيفة يا أما المعلومات ناقصة و لا يمكن مطابقتها على الناخب (يا أخونا ده في مرشحين معرفوش ينتخبوا في دايرتهم عشان الكشوف)

لكن سيبك من ده كله، بتوع الوطني كانوا مازلين يرشوا فلوس و شفنا بعنينا، و أغلب المسجلين ما راحوش الانتخابات، مخدوش فلوس و لا انتخبوا حد غير بتوع الوطني.

لسه مش عارف ألم نفسي و أكتب عن يوم الانتحابات، كل شوية يجيلي تلفون يقوللي على مصيبة شكل.

فصلت و قررت أقعد أهاك في الموقع أفيدلي و أكرملي

بس في وسط الزيطة دي كلها خبر شد انتباهي جدا، بعد ما شفنا بنفسنا فساد و تواطئ و موالسة القضاة (و النضيف منهم بيكبر دماغه أو يبعد عن الشر).

يا عالم ياهوووووه الاعادة في دائرة قسم المنيا بين مرشح الأخوان و مرشح التجمع

سمعتوا دي؟ ركزوا شوية و نعيد

الاعادة في دائرة قسم المنيا بين مرشح الأخوان و مرشح التجمع

أنتهيت أخيرا (بعد تأخير يومين) من اضافة جداول مصر القديمة و عين الصيرة لقاعدة بيانات الناخبين عندنا.

لو أنت من المنطقة تقدري تبحثي عن اسمك لتعرفي لجنتك الانتخابية، لو أنت من مواليد 1982-1986 و محل ميلادك في مصر القديمة يبقى احتمال عالي تكون مسجل و تقدر تنتخب روح دور على اسمك.

الأهم دلوقتي هو أن تنظيم الجداول في صورة قاعدة بيانات يسهل البحث فيها سمحلنا بالفعل أننا نرصد تجاوزات في امبابة (مجرد ترتيب الجداول بالاسم بيظهر الأسامي المكررة مثلا).

عاوزين نستغل الفرصة دي بحيث قبل ما نوصل لانتخابات مجلس الشوري تكون الجداول اتنضفت تماما، محتاجين تعاونكم في جمع جداول كل الدوائر، اتصل بمرشح المعارضة أو الاخوان بمطقتك و اطلب منهم نسخة من الجداول و ابعتهالي.

خخخخخخخخخخخخخخخخخخخخخخخخخخخخخخ

أحا بجد في الأول قلت الموضوع بتاع عبد الكريم عرفني مين من المدونين بني أدم بجد و انبسط قوى و كده، دلوقتي بس خدت بالي أن ده معناه أني هكتشف مين فيهم دني

بس استنوا بس لما الثورة تقوم و أمسك المنصب اللي بيسلموا الواحد فيه البازوكا (اسمه ايه المنصب ده يا جماعة عشان أعمل حسابي)، هتشوفوا بقى يا بتوع بس ده مش رأي، هوريكم ايه اللي مش رأي

و طبعا مش هنسى سيد عبد العال.

و بما أننا في موضع الكلام عن الناس اللي طيزها حمرا

لو عاوز تعرف لجنتك الانتخابية فين أو أنت مسجل ولا لأ تقدر تزور

• قاعدة بيانات ناخبي امبابة
• قاعدة بيانات ناخبي الدقي
• قاعدة بيانات ناخبي مصر القديمة و عين الصيرة
• قاعدة بيانات ناخبي العطارين و اللبان - الاسكندرية

المفروض أن كل مرشح بيحصل على قائمة كاملة بالناخبين المسجلين في دايرته، و المفروض القائمة دي بتتنقح و تتجدد بشكل منتظم.

المفروض برضه أن مواليد 1982-1986 مسجلين تلقائيا.

اللي بيحصل أن المرشحين بيحصلوا على القوائم متأخر جدا و القوائم بتكون مترتبة ترتيب سيئ جدا و صعب التعامل معاها، و طبعا ولا بيتم تنقيحها ولا حاجة.

أما موضوع مواليد 1982-1986 فده مسخرة كل ما حد يسأل على تسجيله يطلعوله بسبب هو ليه مش مسجل، كمان مش واضح هل تسجيلك بيكون عند محل اقامتك كما هو مسجل في الرقم القومي و لا عند محل ميلادك ولا بين البينين.

اللي أنا مستغربه أن الناس بتشكي من القوائم لكن قليل جدا أما حد من المعارضة يوجع دماغه و يقعد ينقح و يدور في القوائم، ليه منظمات المجتمع المدني مش بتعمل مشروع كبير لرصد كل الميتين و التكرار و الانتهاكات الأخرى؟ ولا بيعملوا بس ملهوش فايدة؟ معرفش.

المهم المرة دي المرشحين حصلوا على القوائم في صورة رقمية و ده نظريا معناه أن هيسهل جدا البحث في القوائم، و دي حاجة تسمح للمرشح أنه يتصل بناخبيه و تسمح للناخب أن يعرف لجنته فين و هو مسجل ولا لأ و رقمه ايه و يوفر مشاوير و حرقة دم و كمان يسمح للمراقبين أنهم يدوروا على التجاوزات اللي في القوائم بشكل أسهل.

بس ده برضه نظريا، عمليا حكومتنا الالكترونية بذلت أقصى جهدها في أنها تديك ملفات كافكاوية (أو مباركية) عبثية يصعب جدا التعامل معاها.

عمي كمال خليل مرشح نفسه عن دايرة امبابة و موقع الحملة على النت http://www.imbaba2005.net

يعني المرة دي الانتخابات فيها مرشحين محترمين بجد، و مش في دايرة امبابة بس، يعني ضروري كل اللي يقدر يشارك و يصوت يشارك و ينتخب أي حد من المعارضة.

يا شباب جيلي يا مواليد 1982-1986 أنتم أخطر ورقة سياسية في البلد دلوقتي، أغلبكم مسجل في جداول الناخبين تلقائيا و من حقكم تشاركوا (يا بختكم، مكنتش أتولد سنة متأخر).

بس زي ما كتير منكم اكتشف في انتخابات الرئاسة الهزلية من غير البطاقة بلطجية الحزب الواطي اللا ديمقراطي هيتوهوكم.

ما هو أصله يوم باين من أوله

يبتدي يومي المنيل اللى لا باينله أول من آخر بصحيان بدري علشان اكمل اوم البرزنتشن..بوادر دور برد من يوم الجمعة لا عايزة تيجي و لا عايزة تغور، بس منكدة عليا عيشتي و مخلياني مش عارفة اركز..البرزنتشن لسه مخلصتش، احساس بايخ اوي ذي اللي عنده امتحان و ما ذكرش من أول السنة..يا ربي هو احنا مش هنخلص من الحكاية دي بقه.

ميعاد الطيارة 2 الظهر، مسافرة على الإيطالية، ترنزيت صغير في روما (50 دقيقة) و بعدين صوفيا (بلغاريا) اوصل هناك على 9 بالليل واخد قطر أو أتوبيس 7 ساعات لفارنا.

ده ابتدى تعليق على البسطاء و المنافيخ بس وسع مني شوية، الجزء الأخراني مشافتهوش منال و بالتالي غالبا ممل، و بعدين الكلام ملخبط في دماغي فأخترت أوقف و خلاص من غير ما يبقى فيه ختام واضح.

أنا أصلا عمري ما فهمت المناقشات اللي مبنية على مصطلحات غامضة

يعني ايه مثقف؟

الكلمة جاية من ثقافة صح؟

يعني في حد عنده ثقافة و حد تاني لأ؟

يعني ايه معندوش ثقافة عمره ما سمع أغنية أو شاف فيلم أو قرأ كتاب و سمع قصة أو نكتة أو شاف صورة أو رسمة؟ عمره ما حكى و لا غني و لا قرى و لا رسم؟ عمره ما سأل ولا ناقش و لا رد؟ مظنش البني أدم ده موجود

على سيرة الجنان والبقال

زمان كانوا البقالين في الحتة عندنا قليلين و كان أقربهم لينا عم سمير، و ده طبعا كان البقال اللي بنتعامل معاه، أهلي بيحكولي أني أول أما اتولدت عم سمير سألهم سميته المولود ايه و استغرب جدا لما قالوا علاء و قالهم الموضة الأيام دي أسامي أمريكاني زي مايكل و بيتر.

أتاري الراجل افترض ما دمنا زباين دائمين يبقى أكيد مسيحيين.

المهم زاد عدد السكان و زاد زباينه المسلمين لحد منتصف التسعينات ابتدت الناس تتنك و بقوا على استعداد يمشوا مسافة و لا يشتروش من البقال المسيحي و الراجل رزقه قل.

بعد ما أجرنا الهرم ما بقيتش عارف أنا بنتمي لأي طبقة

بس سيبك أنت الرقاصة كانت جامدة جدا

و أديني أديني أكتر ... المياه في أيدك سكر

و مع ذلك ما فيش فايدة، perl و كرنل و موديوووول و كفاية و يسقط يسقط و حتى الرقص على باطل و نص، العيال دي عاوزالها أجازة

ليش تأخر عباس

من البين ياحسين من زغري وشاب الراس
تانيت ناديت ليش تأخر عباس؟
ريته يـمي .. يـجلي همي .. وينه عمي
ليش تأخر عباس؟

يبدأ فيلم الدعاية الانتخابية لأحمدي نجاد بأغنية بلهجة عامية عربية (غالبا عراقية) تقول ليش تأخر عباس. أغنية أكثر من رائعة، لحن و أداء بسيط، كلمات مؤثرة ، بس مش فاهم حاجة من الكلام رغم بساطته، مين عباس؟

قررت أفهم الأغنية، هاتك يا جووجل، اتفتحت قدامي دنيا معرفش عنها حاجة، معرفش كتير عن الشيعة و فنونهم رغم هوسي بايران.

المغني يسمى رادود، و باسم الكربلائي من أشهر الرواديد، الشاعر جابر الكاظمي، القصيدة عبارة عن لطمية!

لقيت حوارات مع الشاعر و مع الرادود، أهم سؤال هو هل عشت قصة حب تعبر عنها في أغانيك؟ هل حبك الدنيوي خلاك تفهم حبك للحسين و أهله أكتر؟ طبعا في السكة كلام كتير عن قمع و بهدلة على ايدين صدام.

مليت .. ظليت .. انطر واحسب لحظات
وتنوح .. هالروح .. تقدر تصبر هيهات
دمعي يهمي ... جفني مدمي ... وينه عمي
ليش تأخر عباس؟

اللحظات التاريخية حاجة غريبة لا يمكن توقعها، بتحصل ببطء، بتكبر و تتسلق فيك و جواك لدرجة تحس أنك لو مش مركز كانت فاتتك.

يوم 7 سبتمبر 2005 كان زي ما توقعت لحظة تاريخية لشباب ما بعد المعارضة، لكن اللي متوقعتوش، اللي مستجرتش حتى أحلم بيه هو تاريخية ازاي بالظبط.

أذا كانت المظاهرات اللي من بعد يوم الاستفتاء طلعت الرجل الأخضر اللي جوايا و خلتني أشيل كرادين حديد غصب عن عين أعداد لا تحصى من الأمن المركزي، و أضرب ظباط (و أنضرب طبعا)، و أزعق و أزئر ولا كأني بلعب حديد و جودو كل يوم، مظاهرة الأربع طلعت من جوايا بيتر بان، لقيتني بأتنطط و بأطير، و بأضحك و بأتشاقى، و لقيت أي حاجة أتخيلها بتتحقق و لقيت اللي حواليا بيتعدوا مني (أو هما اللي عدوني). بعمل اللي أنا عاوزه مهما شخطوا في الكبار، وصل الموضوع أن الكبار يا أما انضموا لينا و أستعيلوا يا أما خدوا بعضهم و مشيوا.

طبعا السادة الكلاب الجعانة خريجي أقسام العتبة نفضت تراب الجنيات من علينا ووقعونا في الأرض، بس كابتن هوك لسه مأنتصرش و لينا معاد تاني.

فاكرين الكائن اللعين اللي مصر يحلم و يصدق أحلامه اللي أنا افتكرته عقل بعد القضاة ما طلعوا وكلاء نيابة؟ ابن اللذين طلع لسه أهبل و ركبني و خلاني أتصرف بكل الهبل و العبط و قمة قلة الأدب اللي ممكن أوصلها.

ايه الكلام اللي أنا بقوله ده؟ باين تعليقاتكم خلتني أصدق أني بكتب! نحكي القصة أحسن. بس ابدأوا بالصور

الناس كلها عمالة تزن و تقول بعد الانتخابات هنتبهدل كلنا، أنا مش مصدق بالمرة و مظنش في حاجة هتحصل. بس أنا برضه كنت مطمئن و باخد اللابتوب معايا المظاهرات لحد ما اتسحلت و اتسرقت، يمكن أكون غلطان و يكون معاهم حق.

دي محاولة أني أعمل حسابي، يمكن كلامهم يصدق و الدنيا تتقلب

عايز أحيي الناس اللي شاركوني اللحظة دي، بس مش هشكر المدونين، مش هشكر القلة اللي تغاضت عن مشاكل أسلوبي و لغتي و أصروا يقرأوا اللي بكتبه حتى لو كان مش عن المظاهرات، مش هشكر اللي اتصلوا بيا يشجعوني أو يطمنوا عليا، مش هشكر اللي حبيتهم من الصحفيين، مش هشكر أهل شبرا اللي احتفوا بينا بدل المرة اتنين. و غيرهم، مش وقتهم دلوقتي

نوصل المظاهرة عالساعة 2 تقريبا..مفيش ربع ساعة و الواحد يحس ياااه ده احنا بقالنا كتير منزلناش مظاهرات في عز الظهر كده!! مع انني كنت فى مظاهرة روض الفرج السرية الساعة تلاتة الظهر لكن المظاهرة من أولها لآخرها مكملتش نص ساعة.

عددنا كده بتاع 300 - 400، صف أمن مركزي يتيم و متفرط قصاد رصيف نقابة الصحفيين، لكن ما خفي كان أعظم.

نسلم عالعيلة و الصحاب، و نهتف شوية. صحفية تطلب توقيعنا على بيان احتجاج على حرمان الأستاذة الصحفية سكينة فؤاد من الكتابة و النشر. يتوزع علينا منشورات و يفط صغيرة مكتوب عليها كفاية، شوية و آخد بالي انها مش يافطة عادية: دي مضرب دبان مدور و عليه ستيكر كفاية من الناحيتين.

يعني مكفاهمش خلوا بطوط يقول السلام عليكوا و سوسو و لولو و توتو يقولوا مواعظ و حكم، و مكفاهمش الشخبطة على كل بطة أو قطة خليعة و لابسة مايو

(أطفال اليومين دول هيجانين قوى و لازم نحافظ على أخلاقهم برضه، و ربنا يخليلنا السعودية و ديزني و الأضواء و خالتي سوزان). مكفهامش كل ده، كمان عايزين يفتوا و يقولوا للعيال معلومات غلط.

لغز ميكي و الفتي و الجهل

قالك الأضواء مش بس هيخلوا ميكي مجلة مملة، (اتحسري يا بهية) ناوين يخلوها تعليمية كمان، و طبعا في عرف بلدنا ده معناه أننا نفتي و نضحك على العيال و نقول أي كلام و خد عندك

العيشة الزرقا و النهار الأزرق و اليالي الزرقا و العفاريت الزرقا، البلوز أصدق و أعمق و أسهل موسيقي في الوجود.

الغنا الشعبي عموما بيكون صادق، و أحسن مثال اللي بيسموه عندنا موسيقي الميكروباص، لكن أن الموسيقي تكون بتعبر عن حياة urban (بترجموها ايه دي؟) و بصدق، معادلة صعبة! و لما بتتحقق بيكون الموضوع فيه مشكلة، موسيقي بتعبر عن طبقة متسمعهاش غيرها، أو موسيقي بدل متعبر عن الطبقة اللي جاية منها بتسوق نفسها لطبقة تانية، أو موسيقي تقدم مع الزمن أو تبهت من كتر السمع أو متنفعش من غير رقص أو محدودة ينحبس فيها العازف و الملحن، لما يستلمها جيل جديد ميلقيش جديد يحطه، و تتنقل بعد كده لمصاف الفولكلور.

هل تعلم

أن كل من يرتاد جروبي و الأميريكين ابن كلب و ميهموش 90 أسرة يتخرب بيتها بسبب السرطان؟

أن كل مصري يستجرأ يربي قطط يبقي بيتنكر لأصل أهله الفلاحين (بغض النظر عن تربية أهله الفلاحين للقطط عشان يحموا الغلة)؟

أن المصري اللي بيتمحك في الخواجات و بيربي قطط ده أكيد ميهموش البني أدمين و حقوقهم (ما هو هيجيبلهم وقت منين اذا كان بيربي قطط، و ان ضحك عليك و خدعك و بانلك من ناحيته أي نشاط في أي مجال تاني أعرف أن دي خدعة كده بس و تلاقيها جزء من المؤامرة الكبرى بتاعت الغرب اللي بيهمه القطط أكتر من البني أدمين، أيوه الغرب أبو نابين بيقطروا دم هو ده)؟

ويكي ببلاش خبط براحتك على http://wiki.manalaa.net

الموضوع ده بدأ بتعليق عند بنت مصرية على مشروعها ايجيتوبيا

ألف كان كتب تدوينة عن الويكي زمااااااااان و برضه الكبير كبير

ايه هو الويكي

ده نظام لنشر و ادارة المحتوى على الوب (زي البلوج كده ماهو نظام لنشر و ادارة المحتوى برضه) له سمات خاصة شوية.

فكرة الويكي أن أي حد ممكن يعدل و يحرر أي صفحة، يعني كلنا بنعدل على شغل بعد، النظرية هي أن محصلة المعرفة و الخبرة بتاعت المجموع أكبر بكتير من الفرد. نفس المبدأ اللي أثبت نجاحه أسلوب تطوير برمجيات حرة و مفتوحة المصدر كتير.

يعني تصور مثلا أنك بتقرأ صفحة و لقيت غلطة في معلومة، أو حتى غلطة في اللغة أو لقيت عندك حاجة اضافية عاوز تضيفها أو تنظيم جديد أفضل للمعلومات، لو دي ويكي تقدر تعدل و تعمل كل التغييرات دي. بس ممكن طبعا تخرب برضه، أو ممكن اللي في رأيك أفضل يكون في رأي غيرك أسوأ.

اللي بيمنع الويكي من الانهيار و الفوضي هو أنها بتخزن تاريخ الصفحة بالكامل، يعنى مش بس ممكن أقرأ الصورة النهائية، ممكن كمان أقرأ الصفحة كان شكلها عامل ازاي امبارح و مين اللي عدل و عدل ايه بالضبط.

بدل الويكي ما تمنعك من التخريب بتخلي التخريب ما لوش تأثير فعلي لأن ممكن في أي لحظة نقول رجع الصفحة لشكلها أول امبارح مثلا.

اليوم الخامس

صور

مظاهرة كفاية (ميدان الأوبرا)

ده الاختبار الحقيقي للحركة، مظاهرة كفاية اللي بعد الضرب على طول، بدأنا باشاعات أن في ناس عاوزه المظاهرة صامته، ده غير خبر أن النيابة أستدعت القيادات للتحقيق معاها.

المهم شيلنا اليفط و 180 ورقة عليهم مواقع المدونات و الحركات السياسية و غيره و أنطلقنا، أركن بعيد شيل اليفط و اتمشي، أمن كتير في طلعت حرب و بعدين ينقطع و يبان تاني عند ميدان الأوبرا.

سابوا للمظاهرة رصيف كبير (قدام مكتب مصر للطيران)، البوسترات عملت شغل جامد قوي، العدد عادي مش كبير (ناس قالت 300 ناس قالت 500). الحزب الوطني يا دوبك عرف يلم 15 قعدوا يصبعوا و يبعبصوا الهوا (كله من تأثير الفياجرا).

اليوم الرابع:

صور

مظاهرة أدباء و فنانين من أجل التغيير

مظاهرة الفنانين و الأدباء بميدان طلعت، أول تحرك بجد بعد يوم السبت الكئيب، منتعشين من أنتصارنا، تعبانين من مجهود الأيام اللي فاتت، الأدبا طلبوا المظاهرة تكون صامتة، فيها شعر و غنا بس مش هتافات، قررت لو نجحت أعمل بوسترات لمظاهرة كفاية، لو فشلت يبقى يفتح الله.

قابلت سلمى في الشارع بالصدفة، أفتكرنا أيام النسور الصغيرة، لما كنا شباب و أطفال مع بعد بنحاول نفهم و نمارس الديموقراطية، حسيت أن حياتي القصيرة كلها مترابطة كأن عندي خطة، كل حاجة بتصب في بعضها، كل ما أشوف حد من العيال بتوع النسور أحس بالفخر، قابلنا نورا و سيبت اللابتوب في عريبتها و بينا على طلعت حرب.

الخارجية الأمريكاني وبخت الأمن على مصيبة يوم السبت، طبعا شدة الودان بتنفع مع اللي عاملينا علينا دكره، التواجد كان مكثف صحيح بس مش زي مظاهرة التجمع، زنقونا عند رصيف مدبولي بس سابوا حته من الكوردون مفتوح و سمحوا للناس تدخل و تخرج و بالتالي اختلطنا بجمهور كتير.

اليوم الثالث: الأثنين 1 أغسطس

صور

النائب

برضه فوت النائب العام، المحامين بيقولوا محصلش تحقيق عرض أوراق فقط، قعدت في الشغل لحد مجالي خبر قرار أخلاء السبيل، هتعملوا ايه يا جماعة، قالك معتصمين لحد ما الناس تطلع فعلا.

مركز الدراسات

شوية و كلموني، سيبنا نقابة المحامين، حصل شد هناك مع ناس معروف عنهم أنهم مباحث و شكلهم مزقزق علينا، الناس قالت ده وقت فرح مش غم بينا نروح على مركز الدراسات الاشتراكية، حصلتهم هناك، تورته و جاتوه و ناس مهيصة، الناس شكلها مجهد جدا، نورا رايحة على الدراسة تجيب أخوها، مش مصدق أنهم هيسيبوهم في ليلتها.

اليوم التاني: الأحد 31 يوليو

صور

النائب العام

تاني يوم اعتصام عند النائب العام و المعتقلين اتعرضوا على نيابة أمن الدولة، مقدرتش أروح عند النائب العام بسبب الشغل، الأخبار وصلت أن المعتقلين هيتعرضوا تاني على النيابة باكر، كلنا عملنا حسابنا على 15 يوم حبس احتياطي.

التجمع

حزب التجمع منظم مسيرة ضد الارهاب، في المعتاد مباشركش أحزاب، المرة دي الناس أتفقت تشارك عشان نبقى نزلنا الشارع تاني يوم الضرب، رحت على التجمع مئات عربيات الأمن المركزي، يجي سبع فرق كاراتيه (بلطجية محترفين) و هاتك يا ضباط و لوائات.

أحداث الأيام اللي فاتت لا تقل أهمية أو عنف عن يوم الفتاء الأسود لكن للأسف مش واخدة نفس الاهتمام و الحجم الاعلامي، المرة دي محضرتش أحداث يوم السبت، فمعنديش كتير أقوله، ابدأوا بالروابط دي

• طق حنك عمل تغطية كويسة رغم أنه محضرش
• العروبي ملحقش يصور كتير
• كفاية جمعت روابط للتغطية الاعلامية
• شهادة نورا
• شهادة اسلامي

أسبوع من الديمقراطية

اليوم الأول: السبت 30 يوليو (الأسود)

صور

الفجر

قرر منظمي مظاهرة الترشيح أن تتركز الشعارات على لا و باطل، فكرنا نعمل بوسترات كتير بنفس التصميم عشان نوحد شكل المظاهرة.

أنا و منال و نورا و نورا قعدنا 12 ساعة بنحضر في 40 بوستر، كانت الفكرة عمل حملة انتخابية مضادة، كل بوستر كان شكله كأنه جزء من حملة مبارك بصورة ضخمة لمبارك في الصدارة، فوق الصورة بخط أحمر غليظ مكتوب لا و تحتها للاستهبال، للاستنطاع، للفساد، للاستبداد، للبلطجة، الخ

فكرنا كمان نرد على المقولات الشهيرة بتاعت كل و شبع و اللي نعرفه أحسن من اللي منعرفهوش فقلنا لا ده مبيشبعش و اللي نختاره أحسن من اللي ماخترناهوش.

عملنا بوستر تاني فيه انجازات مبارك في 24 سنة، و دول طبعا تعليم منهار، صحة منهارة، ضحايا التعذيب، الفساد، المبيدات المسرطنة و البطيخ المسموم، الخ، على الناحية التانية كتبنا انجازاته الحقيقية و سيبناها فاضية

و هكذا و هكذا، أربعين بوستر حجم كبير، و مجهود خرافي، في الأخر البوسترز دي بانت لمدة 10 دقايق مثلا و كان مصيرها...

هبتيديلكوا بمجموعة صور المظاهرة (معلش يا جماعة الصور مش على مستوى فني عالي اوي لأننا كنا عاملين تظبيطة غلط في الكاميرا)

واسمحولي اعرضلكوا مجموعة صور لحركة ظباط و جنود من أجل التفعيص اللي كانت شغالة على أعلى مستوى في عابدين!!

أنا متهيألي أننا كنا حوالي 2000 نفر، بس علشان اللي الأمن كان عامله فينا محدش هيقدر يخمن تخمين مظبوط، ولا حد ممكن يحكي كل اللي حصل حتى لو كان أول واحد يروح و آخر واحد يمشي.

بعض المدونات بها مشاكل تمنعها من الظهور في مجمع المدونات، شرح طبيعة هذه المشاكل موضوع طويل يتطلب شرح يعني ايه web و html و xml و atom و rss و شرح لأهمية المعايير القياسية على الوب

يمكن أكتب حاجة مبسطة في الكلام ده كله بعدين المهم دلوقتي أنه كل اللي بيكتب في برنامج Microsoft Word و برنامج مشابه و بعدين يعمل copy and paste في مدونته بيخرب مدونته لأن مبرمجي ماكروسوفت ولاد وسخة مش فارق معاهم المعايير و مصممين يبوظوا الوب و يخرتئوها

اللي عاوز يعرف اذا كانت تلقيمته (feed) مطابقة للمعايير ولا لأ ممكن يستخدم feed validator

و دي مجرد عينة، هتلاقوا كل المشاكل من tags زي o:p و st:city و حاجات زي كده اختراعات من عند مايكروزفت

على قد ما المشكلة بسبب برامج مايكروسوفت برضه كان ممكن blogspot تحوشها عنكم كل أدوات التدوين المحترمة بتساعد الواحد يطلع كود مقبول و تفلتر البلاوي بتاعت مايكروسوفت

Ed McBain أو Evan Hunter 1926-2005

في زحمة المذابح فاتني خبر موت Ed McBain بالسرطان.

انا و منال بنحاول دايما نركز و نحتفي بالحاجات المشتركة مابينا، Ed McBain من أكتر الحاجات اللي بنتفق عليها، مهما قرينا أدب راقي و رائع بنرجع دايما لSteve Carrella و Mathew Hope و لا يمكن أبدا نختلف في الرأي مادام McBain هو الكاتب.

لا يمكن أروح سور الأزبكية من غير ما أرجع برواية واحدة McBain أيا كان رحت أعمل ايه أصلا، لا يمكن أسافر من غير روايتين ليه على الأقل.

زعلت قوي ليه يموت ويسيبني، طب لما أقراله كل حاجة أعمل ايه؟ الراجل بيكتب من الخمسينات و بقرأله بقالي 10 سنين.

أغلب الحاجات اللي بقراها بيصنفها المثقفين على انها هيافة، كوميكس و ستريبس، خيال علمي، فانتازيا و جريمة، في الأول ماكنتش بحب أدب الجريمة للدرجة الحاجات الكلاسيكية بتزهقني لكن الراجل ده حاجة تانية خالص، بيكتب procedural crime novels يعني واقعية شديدة على حاجة تفكرك بالسينما نوار.

كان يوم متعب اوي، و غريب شوية. بما أن نص مجموعة الانترنت المستقلة اللى ماتتسماش ما جووش، ادبيست أنا فى تلات تربع شغل البوسترات من قص و لصق و كتابة و تلوين. خلصت معظم البوسترات لكن كان نفسي أفنن فيهم شوية. قابلنا وائل خليل عند مركز هشام مبارك ماحنا لازم نروح بعربية، ما ينفعش نركب المترو بالأعمال الفنية دي.

السكة معقولة مش زاحمة، قابلنا عربية تانية فيها زملة رايحيين المظاهرة برده، يشوفونا و نبتدى نكلكس كأننا رايحيين ماطش كورة..تيت تيت تيت تت تيت..تيت تيت تيت تت تيت

لا ظوغلي

ابدأ بالصور

مش ممكن تدوم السعادة كده من غير حاجة، بقالنا شهر بنعمل مظاهرات و نصعد جامد و عددنا يزيد ووشوش جديدة و احساس بأنه في حاجة مختلفة بتحصل كل مرة، كل مرة كانت حاجة جميلة بشكل خاص.

لكن لا يمكن تدوم.

رجعنا تاني للمظاهرات الكئيبة. متفهموش غلط المظاهرة كانت ناجحة بغض النظر عن العدد القليل و الناس اللى كانت مفروض تيجي و طنشت (ألا كفاية فين بقالهم شهر، ولا هما اكتفوا بأن يتقال انهم هم اللي نظموا كل حاجة من غير ما يتحركوا، ولا بلاش دي الاخوان و العمل فين ولا التعذيب عاجبهم؟) بس المرة دي الجو كان مشحون جدا و الموود العام كان كئيب.

قبل ماأحكى رجاء تجاهلوا الصحافة تماما، لا مصري ولا عربي ولا أجنبي، لا نت ولا ساتالايت ولا ورق، دي عالم مش عاوزة تعمل شغلها، أولا تقريبا مفيش أي مظاهرة عرفوا يقولوا مين اللي نظمها ملخبطين الدنيا تماما (و أنا عارف أنه موضوع يلخبط بس الصحفي شغلته يعرف و يدور مش يستسهل)، ثانيا هلس تام، واحد يقولك كانوا عشرين و التانى يقولك كانوا 500، واحد يقولك ماكانش في عنف خالص و التاني يقولك المتظاهرين ضربوا الأمن. و واحدة رايحة تاخد تصريحات من ناس ماحضرتش و ناس تقولك مظاهرة السيدة قعدت لتاني يوم بالليل وولعوا فيها بخور و ناس تقولك كنيسة مارى جرجس فى الزتون (أحا حتى الخرايط صعبة عليكوا، ماتروحوا تشتغلوا شغلانة بتفهموا فيها أحسن).

سيبك من الصحافة و اقرا المدونات، للأسف عددنا صغير و الطريقة الوحيدة تتأكد هي أنك تقرا من أكتر من مصدر بس هنعمل ايه.

قصره نرجع للمظاهرة، كنا متوقعين جمعيات حقوق الانسان تدعى لمظاهرة كبيرة و قاعدين نتكتك و نخطط مستنين المظاهرة، جم يوم التلات فلسعوا و قاللك مؤتمر في نقابة الصحفيين، المهم مشاورات و تليفونات و قامت المجموعة الانترنتية الخفية المستقلة الرجعية المتخلفة الطائفية الانتهازية التي تم تحليلها طبقيا من كل مثقفى الكنبة متصرفة في مظاهرة، المؤتمر كان مفروض الساعة 6 و بالتالي المظاهرة اتزنقت الساعة 4:30 في عز الحر.

فى السريع طلعنا باعلان، أنا نقيت العنوان صاحب الأشجار طلع بالجرافيك و بما أن مركز هشام مبارك هما أول من تبني الدعوة طلعوا بلستة مطالب و أبويا كتب الاعلان. كان عندنا تلات أيام بس نحضر فيهم لافتات و ورق يتوزع، قضينا يومين مبنعملش حاجة غير نجمع و نقرا تقارير تعذيب، حاجة تنكد كان فاضلي تقريرين لما وصلت لانتهاك طفلة جنسيا قررت ان كفاية عليا مش لازم أعرف أكتر من كده.

مصطفى طلع بالفكرة العبقرية بتاعت البوسترز من الصور و ابتدينا شغل، صندوقين دوكوا و كام بوستر يعبروا عن مطالب المظاهرة و شعارها، ورقة عليها المطالب و و تلات شهادات من ضحايا التعذيب و تتصل بمين لما تتعذب أو لما تسمع عن واقعة تعذيب.