Manal and Alaa's bit bucket

من وقت حجب المجمع أيام موضوع عبد الكريم و أنا شغال في تطويره، غيرت البرنامج اللي المجمع بيعتمد عليه و استخدمت كود جديد بيستهلك موارد أقل و المفروض أنه يرحم السيرفر شوية (لكن على مين).

في نفس الوقت بان أن حلقة المدونات المصرية مش بتتجدد بشكل منتظم فعملنا الاستمارة اللي ممكن بيها الناس تبلغنا عن مدونات مصرية المجمع مش مغطيها.

على فكرة من عيوب النقلة للكود الجديد أننا فقدنا كل المحتوى اللي كان متخزن في المجمع، المجمع السابق كان بيخزن أربع شهور من التدوينات و فيه ناس كانت معتمدة عليه في قراءة مدونات حذفها أصحابها (زي مدونة حمكشة)، المجمع الجديد المفروض يحافظ على التدوينات كلها مش مجرد أربع شهور فقط، و ان كان دي حاجة ممكن تتغير لو المساحة اللي بيحتاجها المجمع صارت أضخم من قدرات السيرفر.

في نفس الوقت فيه شوية مزايا زي أن المجمع دلوقتي بيظبط اتجاه الكتابة بنائا على اللغة المستخدمة و بالتالي ممكن تقرأ فيه الحاجات بترتيب مظبوط أكتر من المدونة الأصلية أحيانا.

الكود الجديد بيتيح لينا كمان أن الناس تعمل تعليقات على التدوينات في المجمع، دي خاصية أنا لاغيها لأن الأفضل الناس تزور المدونات و تعلق في المكان الأصلي لكن ممكن في المستقبل نفتحها للمدونات اللي أصحابها ما بيسمحوش بالتعليقات فيها زي مدونة بهية مثلا.

أما ألطف مزايا الكود الجديد فهي أنه بيقدر يسحب التصنيفات من المدونة الأصلية، طبعا الغالبية العظمي من المدونات المصرية بتستخدم خدمة عقيمة متعرفش يعني ايه تصنيف أصلا لكن لو احترمتم نفسكم و نقلتوا على نظام مدونات بجد هتقدروا تستفيدوا من الموضوع ده. كل تصنيف له صفحة مجمع خاصة بيه و في صفحة بتعمل سحابة تصنيفات. الكلمات الأكبر حجما بتدل على تصنيف يندرج تحته عدد أكبر من التدوينات، و ممكن في المستقبل نعلم المجمع علاقات ما بين التصنيفات (يعني مثلا نساوي ما بين تصنيف Music و تصنيف الموسيقى).

بما أن أغلب المدونات مش مصنفة و مع زيادة عددهم (وصلنا حوالي 500 مدونة) بقى ضروري نسهل شوية على زوار المجمع متابعة التدوينات، أخر حاجة عملتها هي أني أصنف المدونات تصنيف عام يسهل التصفح.

قررت التصنيف حسب اللغة، لكن بما أن المدونين ممكن يستخدموا أكتر من لغة في مدونة واحدة (بل و في تدوينة واحدة كمان)، و بما أن تعديل المجمع بحيث يخمن اللغة تلقائيا هتكون نتيجته حمل زيادة على السيرفر، قررت ان الأسهل هو تصنيف المجمع بحسب مدى احتمال ظهور تدوينات باللغة العربية، دلوقتي فيه صفحة للمدونات اللي بتستخدم العربي أحيانا أو كثيرا، و صفحة للمدونات اللي نادر جدا ما بتستخدم العربي، و صفحة للمدونات اللي معتمدة أساسا على الصورة و أخيرا عملت صفحة خاصة للمدونات اللي أصحابها عندهم اسهال تدوين و بيكتبوا أكتر من مرة في اليوم لأن دول في الغالب بيسقطوا كل حد من الصفحة الأولي للمجمع.

كل صفحة من دول عليها أحدث 30 تدوينة و لكل صفحة بلوك على اليمين.

لسه العنوان الرئيسي للمجمع بيشاور على الصفحة اللي فيها كل التدوينات من كل المدونات بغض النظر عن اللغة و حالة الجهاز الهضمي، يمكن في المستقبل أغير ده و أخلي الصفحة الرئيسية هي العربي مش عارف.

أول أما أرقي دروبال لنسخة 4.7 هحاول أضيف امكانية جديدة بتتيح لقراء المجمع أنهم يصنفوا التدوينات، ده هيسمح للناس أنها تصنف بالموضوع و اللغة و كمان هيسمح للناس أنها تعلم على تدويناتها المفضلة (تحت تصنيف عجبت علاء مثلا).

أي أسئلة، اقتراحات، اعتراضات، أحنا تحت أمركم؟ و متنسوش العمرانية في دعواتكم.