Manal and Alaa's bit bucket

أمال يعني كنت عايزهم يجتمعوا في ساقية الصاوي؟

حاجة سياسية طبيعي استضافتها تكون عند واحد من التيارات السياسية.

و بعدين أنت راجل مشغول خليك في الدورة الرماضانية السادسة للعب في صوابع الرجلين.

الحكايه بقت زياده عن الحد بقي

كل مجموعه ناس مش عارفين يجيبوا تقدير و أهاليهم متجهلاهم و عندهم عقد نفسيه يقرروا يعمل حركه من أجل التغيير

تغيير ايه بس و الله الحكايه مش تغيير مبارك او نضيف او الحزب الوطني الاشتراكي الشعب نفسه لازم يتغير الاول

اللي عمري ما فهمته النوع النتن ده من النقض، ألا انت كنت بتفكر في ايه و أنت بتكتب التعليق جه، يعني معتبر الغرض منه ايه؟ فضفضة ولا نصيحة و لا دي هواية ولا ايه

يعني لما حد يبقى جوه كيان معين و ينتقضه مفهوم ، حد شايف أن فيه طريقة أفضل لتحقيق الأهداف مثلا

لما حد يبقى بيعارض كيان معين أيديولوجيا و بياخد موقف معاكس مفهوم برضه النقض لأنه يبقى بيدعي الناس لتوجهه و أهدافه و بيثبت خطأ خصمه مثلا

لكن اللي من بره و ما لوش دعوة و مش مشارك عند الكيان و لا عند كياتات منافسة بيضيع وقته و وقتنا في مناقشة جدوى وجود الكيان أصلا ليه؟

ايه اللي مضايقكم أن ناس تحاول؟

لو أنت مش فارق معاك نجاحنا أو فشلنا يبقى تخرس خالص، لو عايز فشلنا يبقى الأحسن تنقض من منبر أخر، لو معانا و يهمك نجاحنا يبقى تقوم من على طيزك و تورينا أي عمل ايجابي و بعدين تنقض و تفصص

و يا ترى الشعب اللي عايز يتغير ده سيادتك جزء منه و لا انت مش محتاج تغيير؟ و بعدين هنغيره و نجيب شعب تاني يعني؟ و بعدين لما هو دين أم الشعب غبي و حركات التغيير غبية مش يبوا لايقيين على بعض برضه؟ اطلعوا أنت منها

يقولك زيادة عن الحد و مصدعينا و مش عارف ايه، متغور يا أخي هو حد كان جبرك تقرأ و لا تحضر معانا و لا حاجة؟ منزيد ولا نقل هو كان مال أبوكم.

احة الواحد اتخنق بجد

ايوه

لأن في ناس كتير بتعمل من اجل تغيير الشعب. كل الجمعيات الشبابيه الخيريه التطوعيه اللي شغاله في جامعات مصر أحسن منكم. هم اللي بيعملوا الشغل كلوا انتوا قاعدين عالنت و داخلين مظاهرات بالباجي و المارلبورو مانزلتوش عين الصيره و الدويقه ومنشيه ناصر ما حاولتوش تروحوا للناس اللي محتاجه تغيير بجد وسط برك الخره اللي احنا بندوس فيه عشان نوصل للناس دي.

معندهمش مدقات نمشي عليها اصلا. ما عندهمش ميه تتشرب صناديق رمضان اللي نزلنا نوزعها عليهم. ما عملتوشدروس محو اميه اللي مغلبين نفسنا معاهم فيها.

مش شويه طلاب قاعدين في التكييف بيتكلموا عشان يطلعوا في التليفزيون

و علي فكره احنا مش عايزين نطلع في التليفزيون زيكم. احنا عايزين نغير الناس بجد. بمجهود حقيقي مش بنضال قدام التي في.

عشان كده التغيير الحقيقي لازم ييجي من دول. 50% من مصر تحت خط الفقر. الاجل بيدخل علي مراته و العيال بتبس عليهم. الخال بينام مع بنت اخته.

احنا الناس اللي بتحاول بجد. التغيير يأتي من القاعده و احنا نزلنا للقاعده. تعالوا معانا ووعوا الناس دي. عشان مايجيش سعاده الباشا و يددي كم واحد 5 جنيه و يروحوا زي الهبل في الانتخابات و احنا يتحرق دمنا.

احنا بنخاطر بحياتنا في حطط البوليس اللي بيتشطر عليكم يبل بنطلونه فيها .

اضافة لرد علاء:

أنا من الناس بتوع المظاهرات و التغيير السياسي محبين الظهور بتوع البنطلونات الباجي و السجاير المارلبورو ( بصراحة مش بقدر على تمنها ، بشرب أنواع تانية ) . جربت قبل كده أشتغل مع الناس اللي حضرتك بتحكي عليهم ، الجمعيات التطوعية الخيرية من شباب الجامعات ، المتأثرين بصناع الحياة .. الخ كذا حاجة لاحظتها : الشباب دول مش بس مبيشوفوش سياسة زي ما علاء بيقول ، لأ بيتجنبوها مش بس في شغل الجمعية الاهلية ( و ده بحكم القانون ) ، و لكن في كل حاجة . اللي كنت شغال معاهم كانوا بيبقوا هيغموا عليهم لما أتكلم أنا و كام واحد تاني في أي حاجة فيها ريحة سيياسة. القمع و الفساد و سلطة الأمن و رجالة الحزب الواطي اللي بيشتروا أصوات الناس و قصص الغلابة المعتقلين و حكومة منسحبة تماما ، الناس مش بتشوف منها غير دراع الامن و رشاوي موسمية أيام الانتخابات ، كل دول بتصطدم بيهم في كل حتة و انت في المناطق الفقيرة و العشوائية ، كانوا بيختاروا انهم يتجاهلوا الكلام ده تماما و يبعدوا عن طريقهم و يركزوا في شغلهم الخيري بعدا عن وجع الدماغ.

هما اختاروا انهم يقدموا مساعدات عينية و فصول محو أمية و مساعدات قائمة على التبرع ، و البعد عن الاحتكاك مع البعبع الكبير اللي ضارب جدوره في كل حتة ، عشان يقدروا يواصلوا رسالتهم. جميل و حقهم و قلبي و تقديري دعواتي معاهم - بجد مش هزار-. أنا بقى لقيت ان المشكلة أكبر و أوسع و ان الحكاية مش كافي لحلها تيرعات موسمية و مشاعر الناس الطيبة و فلوسها ، و حتى ده بيعرقله أجهزة السلطة المباركة.

الحاجات دي مهمة و بتعمل تأثير - حتى لو بسيط في عدد قليل من الناس- بس أنا شايف ان المشكلة أكبر و أسوء و بصورة مؤسسية . و هنا ييجي دور التغيير السياسي.

الحركة السياسية الوليدة من عيوبها انها لسة مش قادرة توصل بقوة للمتضررين الأساسيين ، بس في محاولات كتيرة لعمل كدة.

من فضلك متبسطش الموضوع و تقول ان الناس دي بتواجه أخطار مريعة ، بتوع المظاهرات المدللين محبي الظهور مبيشوفوهاش. أنا بقى اعرف ناس في الجمعيات و الكلام ده بالنسبة لها حاجة لطيفة و ظريفة : عمل خيري يتطلب مجهود و لكن بلا مخاطرة و لا قلق ، و رغم كراهيتهم و رفضهم للنظام الا انهم خايفين بكل بساطة و مش عايزين ياخدوا المخاطرة بالمشاركة و يضيعوا مستقبلهم: أمن دولة ، مضايقات ، ضرب ، اعتقال ، حرمان من وظائف .. الخ

و ارجع و اقول كملوا في طريقكم و محبين الظهور بتوع التكييف و البنطلونات الباجي في طريقهم ، و يبقى الموضوع يكمل بعضه و صدقني الطرق بتتقاطع و الحكاية مش أبيض و اسود : كتير من أعضاء حركات التغيير بيشارك في جهود العمل الأهلي و بيدوسوا في برك الخرة عشان يساعدوا الغلابة، مش لازم عشان تشارك في عمل تطوعي تكون انسان منزوع السياسة

الا صحيح ، و انت ليه مبسوط قوي بالبوليس لما يضرب فينا؟ احنا عملنالك حاجة وحشة قوي كده يا اخ؟ عموما البوليس مش بيتشطر علينا لوحدنا ، أكيد انت تعرف ايه اللي بيحصل في اقسام البوليس بصورة اعتيادية

تعالى كده نشوف مستوى المنطق في خطابك

أحنا جزء من المشكلة

ليه؟ عشان في ناس بتعمل شغل مختلف و أحسن مننا

يا سلام منطق ايه ده، أنا هفترض أن معاك حق فيه، ايه بقى اللي يخلينا جزء من المشكلة؟ ما لو تعدد الناس اللي شغالة في المجال العام طبيعي يكون في حد أحسن من حد

لكن المصيبة الأكبر أنك حمار و جاهل و متعرفش أي حاجة عن الناس اللي أنت بتهاجهمهم و مفترض افتراضات و السلام

ازاي بقى؟ أقولك

أولا أنت افترضت أن كل أعضاء حركات التغيير مبيقوموش بجهود مشابهة للي أنت بتتكلم عليه، و ده غير صحيح، كتير منهم نشطاء و متطوعين في جمعيات زي اللي انت بتوصفها بالظبط، كتير شغال في مجال التنمية أو بيتطوع بوقته في المجال ده، الناس بتاعت حقوق الانسان جزء كبير من شغلها في حقوق الغلابة، حقوقهم في السكن و العمل و المعاملة الكريمة من الدولة. فيهم اللي بيقدم مساعدة قانونية مجانية، فيهم اللي بيقدم رعاية و تأهيل لضحايا العنف و التعذيب و التعسف الأمني و العائلي، و فيهم اللي بيحاول يرصد و يدرس ازاي حقوق الناس و موارد البلد بتهدر.

ثانيا أنت افترضت أن المظاهرات عمرها ما راحت حتت فقيرة، صحيحي أغلب المظاهرات كانت حوالين وسط البلد بالقاهرة لكن شباب من أجل التغيير قاموا بمظاهرات في بهتيم و ناهية ، و مرشحى المعارضة بيقوموا بمظاهرات في دخانيق امبابة و الكيتكات و مصر القديمة و بولاق و غيره و غيره، و الأخوان المسلمين ناشطين أكتر كمان في الأماكن دي، ده غير مدن الأقاليم، و ده غير مظاهرات التضامن و الضغط من أجل حقوق عمال و فلاحين.

أنا شخصيا اشتغلت في أبو قرقاص بالمنيا، أبو النمرس بالجيزة، منشية ناصر، مساكن ايواء ضحايا الزلزال بالمقطم، ، و الفخارين و العمرانية و غيره، بالعكس سبب رئيسي من أسباب تحمسي أنا و غيري للعمل السياسي هو المعوقات الشديدة اللي بيحطها تحالف الفساد و القمع أمام العمل الأهلي التنموي الجاد.

لكن نقول لمين، أنت بنيت صورة متكاملة للعالم في دماعك حطيت مجموعة كبيرة و غير متجانسة من الناس في قالب معين و ابتديت تتخانق مع الصورة اللي في دماغك

و لو انت شغال بجد في أي حتة كنت عرفت أن مفيش مكان البوليس ما لوش سطوة فيه، مفيش مكان البوليس مش قاهر الناس فيه، لكن للأسف اللي بيشتغلوا في العمل الخيري أو التنموي كتير منهم بسبب قراره الصائب انه يفصل العمل عن السياسة بيتحول لكائن غير قادر على رصد السياسة أصلا، و دي واحدة من مشاكل العمل العام عندنا، مقسوم يا أما سياسة بس يا أما منزوع السياسة (أو على الأقل ده الانطباع اللي عندي بحكم عملي و تطوعي في المجال).

لما يبقى 50% من الشعب يا بتاع تحت خط الفقر يبقى أصلا كل خطابك أثبت عبثه و فشله، الواحد مش محتاج يروح حتى معينة عشان يقابل أفراد من نصف المجتمع اللي تحت خط الفقر، و بعدين الحريات و الحقوق السياسة حق للجميع، يعني لما يقوموا بتوع المعادي يطالبوا بيها مش هنقولهم لأ خليكوا مقموعين لأن معاكم فلوس الفقرا بس اللي من حقهم ديمقراطية

المغالطة التانية، مستكتر على الناس ظهورهم في التيليفزيون (رغم أنك بتهاجم الناس الغلط، محدش من الاجتماع ده وجه دائم في التييليفزيون ولا حاجة لكن معلش) و بعدين بتطلب نوعي الناس.

طب ما يا سيدي التيليفزيون ده مش وسيلة اعلام بتوصل لملايين؟ ايه المشكلة في استخدامها لتوعية الناس، يعني لو المئات القليلة دي قضت وقتها كله بتزور الناس عشان تكلمهم مش هتلحق توصل كلامها لنفس العدد اللي التيليفزيون بيصلوا، بتهاجم الأداة ليه؟ طبعا أنت مش بتهاجم الأداة انت قررت أنك عارف نوايا الناس (الألهة كتروا قوى اليومين دول و الواحد اتخنق) و قررت أن كل اللي بيطلع في التيليفزيون يبقى نيته التباهي و الشهرة و بعدين قررت أن المهم النية و مش مهم هل ظهور الشخص في التيليفزيون ممكن يكون له تأثير ايجابي و بعدين هاجمت.

الأهم بقى، أنت فعلا متصور أنك هتستفيد ايه من الموضوع ده؟ أحنا عطلنا شغلك في حاجة؟ وقفنا في سكتك؟ نهبنا حد من الناس اللي انت بتكافح عشانهم؟ انتقدناك حتى؟

بلاش دي، بذمتك أنت متصور أن بخطابك المليان هجوم و اهانات من غير متكلف نفسك عناء التفكير و البحث و معرفة انت بتتكلم عن ايه و عن مين ممكن تقنع حد أن يغير رأيي و طريقة شغله؟