Manal and Alaa's bit bucket

في كل مرة يتفتح فيها نقاش عن التحرش الجنسي بالنساء في شوارع الموكوسة مصر ألاقي الناس يا أما بتتكلم كأن الموضوع موجود في كل حتة في العالم يا أما تلاقي الناس بتتكلم على أن المشكلة موجودة في مصر فقط (أو الدول العربية فقط) و ده برضه مش صح.

المشكلة أن التحليل بناء على مشاهدات خاطئة نتيجته دائما اقتراحات بحلول لا علاقة لها بالواقع.

فمثلا افتراض أن كل ستات العالم بيمروا بده بيقود للتصور اللي بيقول أن الرجالة غلابة مش عارفين يمسكوا نفسهم و بالتالي لازم الستات تلم نفسها.

و طبعا اللي أي بني أدم مختارش خيار الغباء عارفه أن الستات في بلاد كتير جدا مبتقابلش التحرش و المعاكسات و التقفيش اللي بتواجهه نساء مصر و بيلبسوا براحتهم (و بمعايرنا المحلية بيقلعوا براحتهم)، و كمان الكل عارف أن في دولة كل حاجة فيها متغطية زي السعودية التحرش الجنسي طايل الستات و الأطفال و السمك و أي حاجة بتتنفس.

و كمان افتراض أن دي حاجة بتحصل في الموكوسة بس أو في الموكوسة و الدول العربية بس برضه مبني على معلومات ناقصة أو مغالطة و نتيجته تفسيرات خاطئة.

يعني مثلا في كل مناقشة من دول تلاقي واحد بيقولك الغرب معرفش ماله ، و صعب علينا جدا فهم أن الغرب ده مش حاجة واحدة و التفسير الجاهز دائما هو الكبت الجنسي في بلدنا، صحيح أن في أغلب دول أوروبا التحرش بالنساء في الشوارع نادر لكن ده لا ينطبق بالمرة على الولايات المتحدة الأمريكية مع أنهم مقارنة بينا معندهمش كبت جنسي خااااااالص.

و لو مكانش البني أدم مننا ذاكرته أخرها اسبوعين كنتم افتكرتم أحداث مسيرة يوم بورتوريكو في نيو يورك في يونيو 2000، و اللي تعرضت فيه ما لا يقل عن 20 امرأة لتحرش جنسي شديد و هتك عرض يخلي أجدعها فسل من بولاق يحس بالغيرة، و زي في بلدنا بالظبط البوليس طنش و الاعلام حاول يبرر و يتعامل مع المسألة على أنها شقاوة شباب و ناس تانية تغلط الستات.

بصي يا أختي المسألة بسيطة جدا و حلها في ايدين الجدع اللي أسمه دارون.

بيقولك أن مهمة أي فصيلة البقاء و أكبر مؤثر على التطور هو الرغبة في البقاء و التكاثر، و الكلام ده ممكن يتعمم بره علم الأحياء من غير ما يبقى مخل قوي (يعني يبقى مخل حبتين بس).

المشكلة أن الردالة المصريين شغالين تحرش و هتك عرض و تقفيش و لا مؤاخذة معاكسة في البنات و الستات و العجائز و اللي in between كمان و ما سابوش غير الرضع، و الأدهى أنهم مقتنعين تماما ماما ماما أن ده حقهم و أن الولايا هي اللي غلطانة، و زي ما التجربة التدونية الملحمية الخالدة أثبتت مينفعش تقنعيهم بالمنطق.

سيبك بقى من ميتين أم المنطق عشان ده مبينفعش في أي حاجة أصلا.

خلينا في غريزة البقاء.

دلوقتي لو ربينا الرجالة زي ما دربنا كلب بافلوف كده على أن التحرش الجنسي بجميع أنواعه يكافئ العقم كلها جيلين و يبطلوا الموضوع ده خالص. كل اللي مطلوب أنكن تخصوا اللي يهوب ناحيتكم.