Manal and Alaa's bit bucket

ده أخري، مش هعرف أكتب عدل عن مظاهرات الاعتراض على مجزرة نهاية العام، المظاهرتين كانوا صغيرين جدا رجال الأمن كانوا متعجرفين و عندهم استعداد رهيب للعنف، نصيبي كان لكمة صغيرة في فكي و الظابط الأهبل ابن الهبلة قاللي لو كنت لوحدك مكنتش تستجرأ تعمل كده (أصل أحنا كان عددنا يجي 70 و هما كانوا 200 و معاهم تلات عربيات امدادات فقط، طبيعي يخاف مني و أنا مش لوحدي).

المصيبة أن الناس طلعت بتصدق كلام الجرايد

في المظاهرتين اللي عملناهم احتجاجا على المجزرة عملنا مناقشات كتير مع الناس اللي في الشارع، و قعدوا يرددوا نفس كلام الاعلام لدرجة أني في الأول افتكرتهم كلهم مخبرين

و بعدين سألتهم بتصدقوا التليفيزيون و الصحافة لما بتنقلكم و تجملكم وعود الحكومة؟ لما بتتكلم عن أحوالكم؟

و طبعا الاجابة كانت لأ قاطعة

أومال بكس أمكم بتصدقوهم ليه لما بيتكلموا عن اللاجئين.

المشكلة كمان في التعود على الغباء، واحد من الناس دي قاللي دول فتحوا بطن أمين شرطة

بدل ما أشتم الحيوان أمين الشرطة اللي يستاهل أكتر من فتح البطن و أنادي بعودة تنظيم الجهاد للعمل المسلح ضد الظباط قلت أناقشه أحسن و سألته الطفلة اللي عندها أربع سنين اللي اتقتلت دي عورت أمين شرطة؟

كانت اجابته طبعا لأ، لكن فسرها أن أهلها هما اللي عرضوها للخطر، فقلتله على فكرة الجملة دي هي اللي الاسرائليين بيبرروا بيها قتل أطفال فلسطين.

النتيجة محدش فهم أصلا يعني ايه، كان فيه مليون رد يتقالوا أبسطهم أن اسرائيل بتقتل الأطفال و هم في طريقهم للمدرسة مش و هم في اعتصام، لكن الرد أصلا متفهمش و من المجموعة كلها و نزل عليهم صمت. معلش أنا من الفضاء و بتكلم تنيناوي برضه.

و بعدين تحس الناس مش بتسمع نفسها أصلا، قعدوا يقوللوا يرضيك والدتك تشوف واحد بيشخ في الشارع؟؟!

قلتله ليه هو المصريين مش بيشخوا في الشارع

فاتبرجل و حد تاني رد و قال بس مش في المهندسين (سامعين يا كلاب؟ الشخ في المهندسين عقوبته الاعدام)

المهم اللي عايز أقولله أن بعد مناقشات طويلة و رفض تام من جهتي لمناقشة مشكلة اللاجئين الأصلية و التركيز فقط على قتلهم الناس اقتنعت و أكتر من واحد فيهم وقف معنا و شال شمعة كمان، يعني يمكن سنين التعليم الوسخ و الاعلام الوسخ و كمان المعاملة الغير انسانية اللي خلت الحدث ده عادي أصلا و اللي خلت المصري ميعرفش يعنى ايه كرامة من أسباب موقف الجمهور المهبب مش العنصرية بس.

يمكن التفسير كمان يكون البرجوازية، تفتكر لو المعتصمين كانوا غلابة من الدويقة مش كنا هنسمع نفس الكلام؟ مش يمكن كان الأمن اتصرف بنفس الطريقة؟ هو يعني مش بيقتل و يعذب في المصريين ليل و نهار؟ محدش سمع مواطن عادي معرض في أي لحظة للنفخ بيبرر استخدام التعذيب في التحقيق؟

عنصرية على برجوازية على تغييب و غباء و قلة كرامة مع بعض كوكتيل عظيم

انضم لينا تلاتة من اللاجئين منهم سليمان اللي بنته و مراته اتقتلوا، حسيت أن فيه ناس مقدرتش تتعاطف معاه لأنه مش بيعوي و يلطم و يمرمغ نفسه في التراب، الراجل اللي اقتنع و انضم لنا قعد يسأل ده أهله ماتوا؟ ده؟ ده؟

المشكلة مش في رفض الاختلاف، المشكلة أصلا أننا مش واخدين بالنا أن الاختلاف موجود مش مصدقين أنه ينفع، الراجل توقع رد فعل معين للموت دارج جدا عندنا (فاكرين شيماء اللي قتلت بشظية من قنبلة ارهابية و أبوها قعد يطلع في التلفيزيون يولول أسبوعين؟) و دراما معينة محصلتش و مخه مقدرش يستوعب دي.

و على غير عادتي هعمم و أقول أننا بقينا شعب جبان لدرجة أننا ما بنفهمش غياب الخوف لما سليمان قال أنا بايت هنا اتلم عليه اهل البلد اللي بحكلكم عنهم و بصدق أصروا أنه مينفعش و أن أمن الدولة هيفشخوه و قعدوا يحاولوا يقنعوه يمشي، رد عليهم ما معناه أنه عايز يموت هنا زي أهله، أو يتسحل و يتسجن بس يبقى في وسط أهله، "النشكاء" فهموا و قعدوا يحاولوا يقنعوه أن يريح يومين بس و بعدين نشوف هنعمل ايه و أنه موته و حبسه مش هيفيد حد، "العاديين" مفهموش تماما بالنسبة لهم ده كائن فضائي.

أما ألطف لقطة كانت الشاب المستريح اللي مش قادر يصدق أن الأمن قتلهم و عمال بيقولك تدافع قلتله ليه هي بعيدة عن الأمن المصري و مش قتل الناخبين؟ مش بيقتل الفلاحين.

قام الواد قالك لأ موضوع الفلاحين ده كان أيام الملك.

و أنت عايش في أيام مين يا حمار

لازم تقرأوا قصيدة زنجي يا ولاد القحبة