Manal and Alaa's bit bucket free speech from the bletches

برضه هنرجع نتخانق مع أشباح وهمية.

أنا لا عندي هوس ديني بالشيعة و لا بالسنة و لا أنا مهتم بالفروقات اللاهوتية بينهم الا فيما يؤثر في السياسة (زي مبدأ ولاية الفقيه و دوره في تشكيل السياسة الايرانية، أو مبدأ الحسبة و دوره في القانون المصري).

و التدوينة كانت عن أغنية (أو نشيد) و عن اطار فني جديد علي، ازاي بقي سيادتك قررت أن المقال مفاده و اتجاهه شيعي؟؟

هل عشان حكيت قصة الأغنية من وجهة نظر شيعية؟ طب ما الأغنية نفسها من وجهة نظر شيعية يبقى طبيعي قصتها تعكس ده، و بما أني جاهل و كان أول مرة أسمع عن العباس بن علي أصلا مكنتش أقدر أحكي وجهة نظر تانية (و مكنش هيهمني أصلا بما أن الموضوع هو الأغنية مش الحقائق التاريخية).

تاريخ مصر الفاطمي اللي مش فاهم عاوزني أنساه ولا أتجاهله ولا أكره ولا ايه بالظبط لا يمكن انكاره و تأثيره فينا واضح جدا من أول اللغة أو اللهجة العامية لحد زينة رمضان و الفانوس.

أما نظرية المؤامرة المسلية اللي عندك فمش عارف ده نقص ولا ايه

فوق يا بابا، الدمنيا مش مليانة ناس قاعدة تدور على ازاي تشوه الاسلام، ولا يفرق معايا ببصلة ان كان تاريخ الأسلام حلو ولا وحش، و متعودتش أحكم على عقائد الناس و عمري ما حاولت أثبت لحد أن دينه كخة و لا بتاع.

التاريخ مش للأحكام الأخلاقية و لا يمكن أصلا نقدر نستوعبه بشكل كامل، و دينك مش مهددني و مخوفني و مطير النوم من عيني عشان أقعد أدور على تلافيف أقنع نفسي بيها.

ده غير طبعا أن غير صحيح أن الشيعة معتبرين تاريخ الاسلام عار و خيبة و مش عارف ايه، زي أغلب البشر هما فخورين بتاريخهم لدرجات ممكن تصل للشوفينية و معتبرينه تاريخ بطولات و تضحيات و عطاء و ناس وقفت في وجه الظلم مهما كان التمن الخ الخ الخ

ده غير أنه مش حكر على الشيعة، و هشير تاني لمقال ابراهيم عيسي و هو رجل متدين (و ان كان غالبا علماني، بس طبعا أنت ولا تعرف الفرق بين العلماني و اللاديني).

أما بخصوص سؤالك الفلسفي العميق، أولا معرفش يعني ايه أبو عرام، و ثانيا نظرتك للدنيا اللي مقفولة على من أسوأ و من أحسن و مين الكسبان مبشارككش فيها و بالتالي غالبا معنديش رد حتى لو عرفت يعني ايه.

طب أنا و برد عليك عشان ده موقعي و أحب أوضح أفكاري للناس بدل ما حد ما يفهم غلط، انت ايه اللي جابرك و مخليك تيجي هما لما أحنا ناس وحشين كده؟ متروح يا عم تشوفلك منتدى تبعبع فيه براحتك و تتخانق مع أشباحك الوهمية بعيد عننا.