Manal and Alaa's bit bucket free speech from the bletches

كنا أثرنا الموضوع ده في المجموعة البريدية للمدونين المصريين http://groups.google.com/group/bloggers-eg/t/bf74f562e317a530 و كنت حاسس من أول الأخبار ان دي كارثة , لان كلام الوزير ما كانش واضح لواحد زيي انه هايفضل اساسا سرعة 256 المفتوحة و لا هاتستبدل تماما بالنظام الجديد , و بالتالي تمتعك بخدمة 24 ساعة و طاقة تحميل اعلي و حسب ما أعلن ان الساعة الاضافي عن 60 ساعة بجنيه و نصف و كل جيجا زيادة بـ 10 جنيه , حسبت لقيت ان انا محتاج 1500 في الشهر علشان اتمتع بنفس المزايا دلوقتي ده علي حسب ما كنت فاهم من انه الاشتراكات كلها مقيدة و الزيادة بفلوس و طبعا كنت مخنوق لاني اول ما اتعلمت انزل افلام تورنت لقيت الخبر في وشي و حتي بعد ما سألت في تي اي داتا و ناس سألت في لينك و عرفنا ان النظام القديم مفتوح و موجود و بنفس السعر , لسه فيه شك انه ده بس لحد بداية تطبيق القرار في اول سبتمبر

بعد شوية بدأ ينقشع الغبار و بدأت أفهم نسبيا ايه الموضوع , لكن بالفعل ناس اتحركت و عملت تجمعات و حملات وحتي خارج الانترنت لجنة حماية حقوق المواطن بدأت تهتم بالموضوع , و ائل عباس ناشر رسالة من مجهول بيدعي انه قريب من جهات سيادية وبيقول ان الموضوع فيه ابعاد امنية

لكن محاولة فعلا لتجاوز حالة " المعلوم من السياسة بالضرورة " بدأت أسأل ناس أخري غير اللي الانترنت اصبح عندهم نمط حياة او مجال نشاط عن رأيهم في الموضوع ده و لقيت منهم ترحيب , الناس اللي بتستخدم الانترنت ساعة و لا ساعتين في اليوم , مش حاسين انهم بيعملوا حاجة مهمة و شايفين حتي ان التقييد كويس , ما بينزلوش الا ملفات نصوص و حاجات بسيطة و شايفين ان 2 جيجا فضل و نعمة و شايفين ان القرار ده هايشجعهم علي الاشتراك لان 45 احسن من 95 و فيه ناس منهم مشتركين في وصلات لكن زهقوا من رداءة الخدمة لان السايبر بيوصل لعدد كبير من الناس , او لان السايبر نفسه مش منضبط ( واحد قاللي انه قعد غير متصل اسبوع لان جد صاحب السايبر مات فقفلوا السايبر و الكهربا و راحوا البلد قعدوا اسبوع ) مش عارف مدي اقبال الفئة دي علي الاشتراك و نسبتهم ايه من مستخدمي الانترنت لكن طارق كامل بيقول انهم الغالبية العظمي

من ناحية تانية الناس اللي مهتمة بالانترنت اكثر , و الشباب اللي بيعتمد علي الانترنت حتي كمصدر اساسي للتسلية و رفع و تحميل الاغاني و الافلام شايف انه يعمل وصلة احسن بـ 30 جنيه , بدل ما يشترك بـ 95 جنيه , و كمان دلوقتي بقي 2 جيجا و بـ 45 جنيه فاعتقد الفئة دي القرار مش هايعمل معاها اي حاجة , و اعتقد الشباب دول نسبة كبيرة من مستخدمي الوصلات لكن نسبتهم ايه لمستخدمي الانترنت ؟

فيه جانب تاني في الموضوع الوزير بيقول ان كان فيه دعم لاقل فئة و هي 256 غير محدود و دلوقتي الدعم هايروح لفئة 256 المحدودة , و ده معناه ان الشركات في الغالب لو نجح موضوع ال256 محدود اسعار الاشتراك المفتوح يزيد لكن وجود منافسة حقيقة بين الشركات ممكن يلعب دور في تثبيت الاسعار او تقليلها اعتقد ده هايظهر من مدي الطلب علي النوع الجديد المحدود و تأثيره علي الاشتراك الغير محدود

قصة دعم الدولة دي محتاجة برضه تساؤل مالك كتب عن ان اسعار الانترنت في مصر - اصلا قبل اي حاجة - غالية و اعلي من دول تانية حالتها مش احسن كثير و كمان كان فيه دعم من الدولة لاقل فئة اشتراك فده يديك انطباع ان الشركات دي بتكسب مكاسب كبيرة و ممكن تقل لصالح توسيع قاعدة المستهلكين و ان ضغط من الدولة او دعم لتثبيت سعر اقل فئة ده مطلب للمتسهلكين المفروض يدافعوا عنه و ان اقل فئة دي ما تقلش جودتها , علي الاقل تفضل زي ما هي الانطباع ممكن يبقي حكم موضوعي بناء علي معرفة بتكاليف مد الخدمات دي و حجم الارباح او يبقي ارداة عند قطاع من المستخدمين يضغطوا باتجاهه دفاعا عن مصلحتهم

علي كل حال , التحركات و الحملات اللي بدأت دي , رغم ان بعضها بيتحرك من غير تصور واضح للمشكلة او الحلول , فممكن تكون - مع ترشيد - نواة لتجمعات تضغط علي الشركات في حال ان الاسعار زادت

http://mabadali.blogspot.com