Manal and Alaa's bit bucket free speech from the bletches

رءوف مسعد احكي لك حكاية يا عم علاء من ألف ليلة. خليفة ما سمع عن “ مدينة النحاس “ فأرسل قائد العسكر موسى بن نصير يجب له أخبارها. وهو ماشي ، موسى لقي نفسه عند قبيلة استضافوه وقدمو له الذ لحم أكله في حياته. بعد 3 ايام الاستضافة موسى راح يشكر شيخ القبيلة علشان عزم على السفر . سأله " قولي ياشيخ القبيلة ايه نوع اللحم اللذيذ ده اللي كنا بناكله " فرد الآخر " ده لحم بني آدمين " ولحد هنا دي أجواء ألف ليلة . اللي أثار انتباهي حاجتين من رد فعل موسى بن نصير. “ والثانيحسب الرواية " صرخ صرخة عظيمة وقال : هل كنا نأكل لحم البني آدميين ونحن لا ندري ؟ “ والثاني انه مشى في طريقه يبحث عن مدينة النحاس. انا كنت متابع اللي بيحصل في مصر من باب الفضول لأني كنت ماشي ابحث عن مدينة النحاس بتاعتي . لقيت خبر القبض على علاء احمد سيف عبد الفتاح . أرسلت ميل لعزوز اسأل " هو علاء ده يل.عنا ؟ط فاكد لي انه بتاعنا ( حلوة بتاعنا دي ؟ !) فتحت الست تبعك ومنال وقرأت الهوا يل . قلت نأجل مشوار مدينة النحاس ونشوف حكاية البني آدمين اللي بيطبخوا على نيران متعددة هادئة وحامية. وأنا اعتقد انه اللي ساكت عن الحق شيطان أخرس. واللي ما شاركش حتى بأضعف الإيمان يعني يبعن رسالة تضامن مع المحابيس يبقى بيشارك في " طبخهم وأكلهم " ويمكن كمان بيساعد في تهوية النار. ويبدو ان أمثالي من البشر اللي داخلين على السبعين استقرت أحوالهم وكآاباتهم ومحتاجين حاجة جامدة تحركهم وجزء من الحاجة دي لا بد انه يكون شخصي , يعني لا زم أعرفك ( شوية ع الأقل ) وبالتالي اهتم شويتين . ولعلك لا تعرف ان والدك نشر لي في مطبوعات القاهرة التي أسسها مع علاء سويف وآخرين اول كتاب لي بعد غيبة 12 سنة عن مصر وانقطاع طويل عن الكتابة .وكده أتعرفت على بقية المجموعة اللي كانت بتروح عند عزوز في مصر الجديدة. بما فيها والدتك . يعني بعرف اهلك من قبل ما تتولد انت! بس يبدو انه كان من الضروري انك تتجبس وتتبهدل علشان اعبر اهلك حسب تعبيرك! اقول سر شخصي ان حبستكم دي قدتني فكرة ازاي انهي رواية كانت القفلة محيراني اكثر من شهر .ده بمناسبة انك وعدت انك تنشر لي في النيت اللي لسه بخاف منها وبتعامل مع الكمبيوتر باعتباره نملية آو ثلاجة بلغة العصر أحط فيها الحاجات . في صفحة الهوم بناعتكم انت كتبت على عادل حمودة والمثليين وعبدة الشيطان. آه بأه الرواية الجديدة بتتناول الحكايات دي . وفرصة بعمل دعاية لنفسي وروايتي وشكرا على بعض الإضاءات وعلى الحاجات اللي عملتوها وشكرا للتنين البمبي اللي رفع معنوياتي .