كتابات علي الفيل
من سجن طره تحقيق
بإسم الشباب المعتقل
لبنت و بصوتها الجرئ
فاعننيها شايفين الامل
إصحي يا مصر
حتي بناتك
ف السجون
إصحي يا مصر
خيرة الشباب
ليكي يهون
آدي ندا
قد النِدا
مصرية حره و بجنون
و آدي رشا
عقد الكرامة ف صدرها
حالف يكون
و آدي أسماء
إلليضحكة سنها
تملا العيون
و بنات على حب اوطن
اتجمعوا
لجلن نكون
باسم الشباب المعتقل
يا مصر
مدوا فرحتك
بين السجون
و المعتقل
لموا شبابك يا بلد
لموا البنات
سجنوا الأمل
خافوا الديابه
لما شافوا
بنت مصريه
بطل
واقفه و بصوتها
اللي زلزل
و اللي صابهم بالشلل
و اللي واقفه
جنب أخوها
و بشجاعه
بدون خجل
و اللي حالفه
لم تطاطي
واقفه صابره
كما الجمل
باسم الشباب المعتقل
ألفين تحيه ا ندى
ألفين تحه يا رشا
و ألفين لأسماء
اللي ضحكتها
عسل
8/5/2006
علي الفيل
مغنواتي الوطن
أصل الحكاية
أصل الحكاية .. كده وكده
وكوره تايهة .. بين دا وده
ومن الملك .. للزمبلك
كل الطرق .. منفده
من سي البتاع .. اللى ركب
يوم ما ابتدا
ولغاية اللي .. فتح كتاب
العربده
مجد ف قلبك ربنا
ف المبتدا
أو صلي لو مسلم
بشوقك
ولا سوق ف البغدده
أصل الحكايه .. ف كلمتين
فوق المدى
عزبه وتكيه .. إتقسمت
بالوادوده
بين اللي فوق .. واللى اترمى
ف حضن العدا
بين اللى باع .. واللى اشترى
واللى ارتضى
بين اللى نايم .. والمصهين
واللى عاش .. بين ده وده
بين المرخرخ .. والمتختخ
واللى عايش .. ع الصدى
ماهى مهرسه .. على دروشه
مسيغة .. على قطر الندى
بيعه وبايعها .. سي البتاع
وأهل البتاع .. لمعدده
ولا نافعه .. فيها مريسه
ولا مملكه .. ولا صعلكة مسترشده
وآخرتها .. توهة ملخفنه
فيها اللى فاهم .. واللي .. واللي
واللى واخدها كده
لكن بقى كفايه كده
عايزالها وقفه .. دي البلد
علوا الندا
فوقوا بقه .. شوفوا الحقيقه
واطلعوا .. براها .. سيبوا المصيده
ولاحتى .. سايبنها .. تهاتي .. وتندبح
مستقيده
ولاحتى .. بتوه الحكاية . فوق
شفايف .. وحدها. متردده
هاالبت عايزينها .. تقوم .. تنده
وصوتها يتنبح .. وإنتم كده
قوموا وثوروا .. لعرضها
يكفى كده
آن الأوان .. ولا عادشي وقت
سوى .. لتجديد الندا
هيه كده،
12/5/2006
إقرار مختل عقلي
أقر أنا الماضي أدناه
ولجل عيون .. الأمن الصاحى
ف كل مكان
ولجل الدولة .. وأمن الدولة
ولجل حبيب العادلي .. كمان
ولجل الماسك .. درع مجند
ولجل الكبرا .. كل الكبرا من الخصيان
ولجل الحاكم .. وابن الحاكم
ولجل عيون .. الست سوزان
إني بكامل .. عقلي وجاهز
إنى اتحمل .. أيُها تهمه. بدون عنوان
وإني الفاعل .. والمتسبب
وحدي ف هز .. جميع لإركان
من أمريكا .. لغاية روسيا
وإنى كبير .. حركة طالبان
وإن المدعو .. قال: بن لادن
والزرقاوي .. دول كرافان
وإن كوارث .. وإنفجارات
الدنيا بحالها .. فيها مدان
وإن الظلم .. العايش فيه
أيُها مصري .. بين المطرقة والسندان
أنا اللي وراه .. واللي عملته
وأنا اللي مليت .. الدنيا سجون
وأنا السجان
وأنا الغولة .. والعفريت
وكمان دراكولا .. والشيطان
وأنا المر .. اللي شربتوه
وحرامي الحله
وكل ما يطلع ف الحسبان
وانا البوم .. وغراب الشوم
وبكل بساطه .. أنا الطغيان
يعني كده .. وبكل صراحة
وعلى بلاطه .. وبدون كدب
بكل جنان
عايز الكل ينام مرتاح
من سنبوسكا .. لسوسكا
لغاية بوش . العتره المجدع
أبو صفوان
وإني جاهز لاتهاماتكوا
بين الحاضر والمستقبل
لأ وزيادة .. الماضي كمان
لأجل متتقفل قضاياكم
وتفضونا .. وتفضوكم
م التوهان
أصلها ف الأول والآخر
هوجه ماكانتشى . ف الحسبان
وقولوا بكل بساطة
عليَُه
واد مختل .. وصابه جنان.
(سجن تحقيق طره) 11/5/2006
إهداء من شباب مصر المعتقل في سجن تحقيق طره ... كفايه - الغد - العمل - الاشتراكيين الثوريين - الناصري - الوسط الاسلامي - الكرامة ... إلى سجين الحرية د / أيمن نور
مغنواتي الوطن على الفيل
ثورة الجوع
جايه جايه
جايه من بعد إنتظار
ثورة جايباها
كفاية
وغد .. نور الشمس
نار
ثورة بإيدين
الغلابا
و العمل و يا اليسار
و إشتراكي
قومي ثاير
ثورة جايه بالنهار
ثورة الشعب اللي عايش
تحت خط الفقر
دار
ثورة .. بكره
الثورة جايه
ياما ظالم
راح و غار
مهما طال
الليل علينا
لينا عند الظلمة
تار
و اللي نايم . بكره يصحى
و اللي صاحي
صحته .. عار
بكره نور الشمس
طالع
و الخبر .. جايلنا
سار
م المزارع
و الشوارع
م الكنايس
و الجوامع
من بعيد
نفس الشعار
البلد دي حره
و إحنا
إتخلقنا
للنهارده
غصبن ع اللي
حاكم فينا
غصبن عن
هذا الحمار
اللي رافض
كل حاجه
و بفساده
عقله طار
بكره يتحاكم قصادنا
و اللي يحكم
مستشار
أو رصاصة
تيجي غلطه
و يعلنوا
إنه انتحار
كافه الأحوال
يا ظالم
التاريخ
أخد قرار
التاريخ
أخد قرار
8/5/2006
علي الفيل
سجن طره
غرست بكل المقاييس
مبروك عليك يا سي الوريث
غرزت وفين بس الفتيس
ماهى تكيه .. وخدتها
شروة .. مقاولة
وبكره راح تبقى الرئيس
على جثتي .. وإبقى قابلني
حدش يصدق .. إن إبليس اللعين
ف الجنه .. راح يبقى عريس
أو إن عاشق للوطن
ممكن ف يوم
يبقى خسيس
دا بعيد على شنبك
لو إنك أجرُدي
مخصي وتيس
وإن كنت قادر
باللي محمي خلفهم
دلوقتي
راح تقدر تهيص
وإن بسلامتك .. وبعصابتك
وبكامل كلاب المعتقل
الشعب يوم .. راح يستغيث
يبقى إنته غلطان
يا ابن ماما
يا اللي جاي ليلة خميس
غلطة
على إيدين .. دايه عامشة
وبنت كلب
يا ريتها سابت حضرتك
ميت فطيس
لكن قدر .. إنك تعيش
لجلن متفرسنا
وسبحان الذي .. خلقك نفيس
بارد .. كلح
والدم ف عروقك زفر
وبدون كرامه .. لو بصيص
لكن أحب أعرفك
إن البهية .. مش تكيه
لحضرتك
وإن كان أبوك
حاكمنا .. بالجيش والبوليس
ها البت .. إسمع كلمتين
وافهم بقى
ياتسيبها .. وتعيشلك
يومين
يا تموت تعيس.
11/5/2006 (سجن تحقيق طره - غرفه ١ - عنبر ٧ - سجناء الحرية)
والله زنزانه عجب
واللي انكتب .. فيها
يزودها عجب
ماحد عارف .. السجين
هوه اللى فيها .. ولا دا اللي
ف الوطن عاش مغتصب
جمَُع يجمع .. والمُجمع
يا ولد فيه الغضب
ساكن مساكن .. واللي راكن
شاف لغاية .. ما اكتئب
تعبان وحيله .. لم قوي
لكن على جدارها .. كتب
حُره البلد .. حُر الولد
يا عم يا ظالم مدد
مين عاش غلب
وف صمت زنزانه
على جدارها .. دهب
أول من سكن .. هذا المكان
نار .. لهب
ويمين تلاته .. العهد موجود
ما اتشطب
والله يا زنزانه عجب
مهمن تكوني صغيرة
ولا كبيره ع البلد .... هوه انكتب
رغمن عن السجان .. وكرباجه
اللى واكل ضهرنا .. باسم الشغب
واللى رماه الشوق .. والكتاف متغندره
تحيا الرتب
ملعون أبو تلك الرتب
راح يجي يوم
ليكي يا زنزانه عجب
والوضع فيكي يتقلب
ويجيكي وكلابوا
اللي ماخدنا .. من كلاموا
غير خطب
هوه وعيالوا .. والمدام
واللى بيبوسوا العتب
من بلطجيه .. وصهبجيه
وأرزقية .. ومال بلدنا المكتسب
و المغتصب
وإن طال شويه الليل .. يهون
الشعب جاهز بالحطب
والقيد .. ماعمره يطول
ف إيدينا .. أو يصيبنا
يوم تعب
ولا عُمر .. قضبان الحديد
تمنع ... شعاع . ناوي الهرب
أصل اللي .. عارف سكته
وحقه اتسلب
ما يرضى .. غير الثوره
إن صابه الغضب
يحيا الغضب
يحيا الغضب.
11/5/2006