Manal and Alaa's bit bucket free speech from the bletches

تعال نشوف الحكاية من زاوية تانية احنا وبورما الفرق الهام بين عمال غزل المحلة ومعاهم الشعب المصري كله وبين الشعب البورماوي : ان الشعب البورماوي طلع بقيادة الرهبان البوذيين عشان حاجة اساسية وهي التخلص من حكم العسكر وتحقيق الدموقراطية . الفرق الثاني ان الرهبان ناس مصدقة دينها بجد وماشيين حافيين وبيشحتوا اكلهم طقة بطقة من الناس في الشوارع .ما فيش موائد رحمان وكذب وموائد رمضان في البطرخانة ونفاق. شفت عمرك رجال دين زي اللي عندنا بيدعوا للحاكم بعد الصلاة ان ربنا ينصره على اعاديه؟! بتوع المحلة مع كل الاحترام ليهم طلعوا عشان الحوافز تطبيقا للشعار الخالد للشعب المصري ( عض قلبي ولا تعض رغيفي) موضوع الديموقراطية والتوريث والكلام اللي ما يجيبش رغيف .. لسه قدامه كثير . وعلى فكرة اخدت بالك من القضاة اللي الناس موتت نفسها علشانهم بما فيهم حضرتك بيعملوا ايه في الصحفيين؟ وعلى فكرة عاوز اطمنك بأنه اول ما عمال المحلة ياخدو القرشين بتوعهم حايفكوا الإضراب ويرجعوا تاني يشتغلوا زي الفل . ما تقلقش ما فيش حاجة حاتحصل في غيابك ولا حتى في حضورك . عارف الناس بتتمنى ايه في مصر ( يعني معظم الناس) .. انه العسكر يجوا من جديد . شفت الفرق بيننا وبين بورما؟