Manal and Alaa's bit bucket free speech from the bletches

فيه ناس بتتسائل عن مصدر الاحساس بالاضطهد عند المسيحيين المصريين، فكرت ألم شوية روابط بتحكي عن الاعتداء على أرواح و دور عبادة المسيحيين، و لقيت المهمة صعبة جدا، تقارير حقوق الانسان المصرية بدأت تتجمع على النت من منتصف 2003 فقط، الصفحات الاخبارية العربية برضه جديدة، و كالعادة صفحات الوب العربية معمولة بشكل سيئ جدا و صعب على محركات البحث اللي زي جووجل أنها تلاقي المحتوى (كفاية أن نسبة كبيرة من المواقع العربية مش بتعلن الencoding مظبوط).

حتى حادثة رئيسية زي الكشح مش عارف ألاقي تقارير عدلة ليها. حد عنده نسخة من تقرير المنظمة المصرية لحقوق الانسان عن الكشح؟ عموما فيه كتاب اتكتب يوثق أحداث الكشح (اللي هما على مرتين تلاتة مش حدث واحد أصلا).

المهم دي قائمة قصيرة بالحاجات اللي لاقيتها، يا ريت لو حد عنده روابط تانية يقول، أنا تجاهلت تقارير الاضطهاد اللي من قبل أجهزة الدولة على أساس أن الدولة مطلعة ميتين أبونا كلنا، لكن لازم ناخد بالنا أن بالنسبة لكتير من المسيحيين الاحساس ميفرقش لما يبقى الاضطهاد موجه ليهم بسبب ديانتهم، و تفاديت كمان الأحداث اللي مرتبطة بأن أفراد غيروا ديانتهم بما أن كل الأطراف (و بالذات الكنيسة) بتتعولق في الموضوع ده و متفقة تقمع حرية الفرد (و خصوصا لو كان الفرد ده واحدة ست).

• نوفمبر 2003 أحداث قرية جرزا: ملقيتش ذكر ليها غير في مقال في جريدة العربي بيهاجم تقرير لمركز ابن خلدون
• سبتمبر 2004 أحداث العنف في قرية الشوبك بمركز الصف: معرفتش ألاقي أي تقرير عن خارج مواقع جماعات أقباط المهجر، لكن وقتها الحدث اتغطى اعلاميا في صحافة المعارضة
• نوفمبر 2004 قرية منقطتين، سمالوط، المنيا: مذكورة في موضوع في ايلاف عن قضية وفاء قسطنتين، زي ما قلت موضوع وفاء قسطنتين تلكيكة و اهدار لحقوق الست وفاء لكن المقال بيذكر أحداث عنف و تخريب كرد فعل على بناء جمعية خيرية مسيحية، ذكرت برضه في تقرير مركز ابن خلدون
• و طبعا أكتوبر 2005 أحداث محرم بيك كلنا عارفينها لكم مفيش مانع نبص على تقرير المنظمة المصرية لحقوق الانسان
• يناير 2006 العديسات بالأقصر: خبر من البي بي سي و تقرير جمعية المساعدة القانونية، قتل مواطن و حرق كنيسة بسبب اصلاحات في الكنيسة
• يناير 2006 كفر سلامة، منيا القمح بالشرقية: تقرير جماعة تنمية الديمقراطية، و دي حادثة فظيعة لم تغطى اعلاميا بشكل جيد، معاقبة كل مسيحيوا القرية و الكنيسة بسبب جريمة ارتكبها فرد.
• مارس 2006 عزبة واصف، العياط، الجيزة : تقرير الجمعية المصرية لمناهضة التعذيب و تقرير العربية حرق منازل و جرحي لأن المسلمين ظنوا أن في كنيسة هتتبني (التقرير بيذكر حادثة اسنا، مش فاكر أنا موضوع اسنا ده حد عارف ايه الموضوع؟)
• و أخيرا أبريل 2006 الاسكندرية:....

الملاحظ أن الأمن أو جهات رسمية تانية دائما ليهم دور كبير.

و خليكم فاكرين فيه أحداث أكتر من كده.