أوعي الويكي ويكي

ويكي ببلاش خبط براحتك على http://wiki.manalaa.net

الموضوع ده بدأ بتعليق عند بنت مصرية على مشروعها ايجيتوبيا

ألف كان كتب تدوينة عن الويكي زمااااااااان و برضه الكبير كبير

ايه هو الويكي

ده نظام لنشر و ادارة المحتوى على الوب (زي البلوج كده ماهو نظام لنشر و ادارة المحتوى برضه) له سمات خاصة شوية.

فكرة الويكي أن أي حد ممكن يعدل و يحرر أي صفحة، يعني كلنا بنعدل على شغل بعد، النظرية هي أن محصلة المعرفة و الخبرة بتاعت المجموع أكبر بكتير من الفرد. نفس المبدأ اللي أثبت نجاحه أسلوب تطوير برمجيات حرة و مفتوحة المصدر كتير.

يعني تصور مثلا أنك بتقرأ صفحة و لقيت غلطة في معلومة، أو حتى غلطة في اللغة أو لقيت عندك حاجة اضافية عاوز تضيفها أو تنظيم جديد أفضل للمعلومات، لو دي ويكي تقدر تعدل و تعمل كل التغييرات دي. بس ممكن طبعا تخرب برضه، أو ممكن اللي في رأيك أفضل يكون في رأي غيرك أسوأ.

اللي بيمنع الويكي من الانهيار و الفوضي هو أنها بتخزن تاريخ الصفحة بالكامل، يعنى مش بس ممكن أقرأ الصورة النهائية، ممكن كمان أقرأ الصفحة كان شكلها عامل ازاي امبارح و مين اللي عدل و عدل ايه بالضبط.

بدل الويكي ما تمنعك من التخريب بتخلي التخريب ما لوش تأثير فعلي لأن ممكن في أي لحظة نقول رجع الصفحة لشكلها أول امبارح مثلا.

مع مشاركة عدد أكبر من الناس و وجود امكانية لمناقشة العمل حتى اختلافات الأراء و الأذواق بتتحل، يا اما بنوصل لصيغة ترضي الكل أو بنقسم الصفحة و نعبر عن الأراء المختلفة.

الويكي في رأيي أفضل وسيلة للعمل المشترك طالما في ثقة متبادلة ما بين نسبة كبيرة من المشاركين، و بتوفر مناخ ديمقراطي حقيقي للشغل، تقدر فيه تساوي كل الناس ببعض. مش بس كده الويكي أثبتت أنها وسيلة جيدة جدا لحل الخلافات، الخلافات الشكلية على الصياغة اللي ممكن تاخد ساعات في الاجتماعات بيبان تفاهتها على الويكي لأانك بتشوف بعينك أنهم كلمتين بس اللي عليهم الخلاف، قدرة كل رأي أنه يطور محتواه بالتوازي بيمنع أن رأي يتسلط على التاني، وجود محايدين بيسمح للناس أنها تشوف المشترك في الأراء المختلفة و تصيغه لوحده و هكذا

ده غير طبعا مزايا من نوع امكانية مجموعة تشتغل مع بعضها من غير ما يبقوا في نفس المكان (أو حتى نفس القارة)، و انعدام تأثير حاجات زي فروق التوقيت و هكذا.

من مزايا الويكي برضه السرعة في الشغل، الأسلوب التقليدي لكتابة عمل مشترك أن فرد واحد بس يكتب مسودة، لو اتعطل النفر ده اتعطل الشغل كله، كمان الأسلوب التقليدي ما بيشجعش المشاركة البسيطة، افترضوا مثلا أن أنا عندي فكرة لمقال بس مش قادر أكتبه، ممكن بالويكي أرمي الفكرة و النقاط الأساسية و غيري يكمل.

للي قلقان الويكي مصمم بحيث يكون سهل جدا جدا جدا في الاستخدام

اللي مش مقتنع يبص على ويكيبيديا دي موسوعة (دائرة معارف) معمولة بنظام الويكي و مفتوحة لكل من هب و دب و مع ذلك أدق و أشمل من الموسوعات الشهيرة في حاجات كتير، و الأهم بدل الانحياز لرأي واحد في حاجات زي القضية الفلسطينية بتحاول تعبر عن كل الأراء أو حتى أضعف الايمان بتعلم على الصفحة بشكل واضح أن محتواها عليه جدل و خلاف واسع.

و على فكرة في ويكيبيديا عربي و اتفضلوا اقروا تعريف الويكي عند ويكيبيديا.

أنا و الويكي

الويكي اتولدت جوه مجتمع البرامج الحرة و بالتالي أحتكيت بيها من بدري و استخدمتها كتير، أسمحولي أحكيلكم عن تجربتين.

ويكي مهرجان الجنو/لينوكس

في أبريل 2004 أتفق أعضاء /dev/cabal/ مع ساقية عبد المنعم الصاوي على تنظيم مهرجان لتعريف الناس بنظم تشغيل بجنو/لينوكس و البرامج الحرة مفتوحة المصدر (installfest)، ابتدينا الشغل ب5 متطوعين و من غير أي تمويل و محدش كان عنده أي خبرة سابقة في تنظيم حاجة زي دي. كان قدامنا تلات أسابيع فقط نجهز فيهم المهرجان و نعمله دعاية و نحاول نوصل لمصدر تمويل.

طبعا أحتجنا ناس أكتر، فعملنا دعوة لأي حد يتطوع، لأن مكانش في وقت نقسم الشغل بشكل رسمي و لأن محدش كان عنده فكرة ايه اللي مطلوب يتعمل و يتعمل ازاي قررنا نعمل ويكي و نستخدمها في التنظيم، في الدعاية للمهرجان عملنا حسابنا نوجه الناس للويكي عشان يفهموا أن المهرجان اتنظم بجهود ذاتية و مقامش بيه ناس خبيرة و متخصصة.

على الويكي بدأنا بطلب الناس أنها تسجل أساميها كمتوطعين، و تسجل ايه الموارد اللي هيسلفوها للمهرجان و ايه الموارد اللي هيتبرعوا بيها (في الأخر طلعنا مش محتاجين تمويل)، ده غير طبعا مساحة لعصف الذهن و التفكير في أنشطة و فعاليات للمهرجان.

قدرنا بسرعة نلم حوالي 20 متطوع، و ابتدينا شغل على الدعاية، حد يقترح اعلان، حد يكتب مسودة، حد يعدل، حد يترجم، حد يحول لتصميم لحد ما نوصل لصيغة متفق عليها و بعدين نشجع كل حد يطبع يوزع بمعرفته و يكتب على الويكي وزع فين. بالشكل ده قدرنا نعمل اعلانات في أغلب جامعات و معاهد و مناطق سكنية كتير على مستوى الجمهورية، ده غير طبعا اللي اتوزع بالايميل و الاعلانات اللي نزلت على مواقع كتير.

نفس التكنيك استخدمناه عشان نجهز ورق نوزعه على الناس و غيره و غيره.

في الأخر كان يوم ناجح جدا جالنا حوالي من 2000 الي 3000 زائر، و كان أكبر مهرجان جنو/لينوكس من نوعه على مستوى العالم و كله بفضل الويكي.

ويكي جنو/لينوكس مصر EGLUG

بعد نجاحنا في استخدام الويكي و الديمقراطية المطلقة في تنظيم المهرجان كان صعب علينا نرجع نشتغل في اطار تاني، قررنا نبدأ مجموعة جديدة لمستخدمي الجنو/لينوكس و قررنا من الأول تكون ديمقراطية و طبعا الويكي كانت أهم حلقة في الموضوع.

أول حاجة وقت تأسيس المجموعة كانت وضع تصور لشكل صفحة المجموعة و الاتفاق على قواعد العمل و لوائحنا الداخلية، بدأنا برضه بعصف ذهن و بعدين كتبنا دستور للمجموعة على ويكي.

تصوري معايا كده دستور يتم صياغته على ويكي، أي حد يعدل بمزاجه (طبعا بعد الاتفاق و الاستفتاء جمدنا الدستور)، كل قواعد و قوانين المجموعة بدأت على ويكي.

أي مقال بيتكتب، أي نشاط بيتنظم، محتوي أي دورة تدريبية أو محاضرة، تقريبا كل حاجة بتعملها المجموعة بيتم الاتفاق عليها عن طريق الويكي.

ويكي ويكي في كل مكان

من بعدها بقيت كل ما أشارك في مؤتمر أو ورشة عمل نستخدم ويكي عشان ندون الكلام اللي طلعنا بيه و عشان نقدر نكمل الحوار بعد ما نروح، في الشغل بأستخدم الويكي داخليا عشان أنظم شغلي و عشان غيري يقدر يتابع أنا بعمل ايه و يقترح علي أي حاجة. مشاريع البرمجة اللي بشارك فيها أغلبها عنده ويكي للمبرمجين و المستخدمين يرموا أفكار جديدة و يوثقوا اللي موجود.

أصدقائي ابتدوا يستخدموا ويكي شخصي على البالم أو اللابتوب بعني أجندة و كشكول شخبطة و مذكرات و كل حاجة في نفس الوقت.

و هكذا و هكذا

الدور عليك

نفسك تنخوري و تكتشفي ايه موضوع الويكي ده، عاوزة تجربي بنفسك؟ احنا فاتحينلكم ويكي عندنا اتفضلي خبطي براحتك

ملحوظة: لازم تعمل sign in باسم بالانجليزي يكون مكون من أكتر من كلمة و كل كلمة بتبدأ بحرف capital مثلا AlaaAbdElFatah أو ElShabah

ويكي ببلاش خبط براحتك على http://wiki.manalaa.net