Manal and Alaa's bit bucket free speech from the bletches

في هذه الحالة الوجودية ممكن انتخاب بيسو ريسا لحاجة اي حاجة او نائب رئيس الحاجات( مش الحجات ..جمع حجة) خاصة احنا في الشهر اياه ، اللي فيه ليلة القدر ، واحتمال تكون الخطوط واصلة واللي قاعد فوق يوصله الدعاء ويصدق ..ويعمل بيسو رئيسا لحاجات او نائبا لرئيس الحاجات . يعني هو مبارك احسن من اي مواطن في ايه؟ ضربة الطيران وثبت انه كان قاعد في القاهرة باعتباره قائد الطيران . شفت قائد طيران بيسوق طيارة ويروح يضرب الأعادي ؟ بأمارة ايه؟ طيب اذا مات مين يحل محله فورا ويواصل ضرب الأعادي من غرفة العمليات اللي تحت الأرض ؟ ممكن تقل لي جمال مبارك احسن من شعبان عبد الرحيم في ايه او ليه او الاثنين معا؟ هما زي بعض بيحبوا عمرو كوسة ووبيكرهوا اسرائيل . عارف ليه ؟ لو اسرائيل عملت جدعة مرة واحدة في حياتها ( ودي احتمالات قائمة طبقا لقوانين الجدعنة) وتقوم عاملة صلح فوري وراجعة لحدود سبعة وستين او حتى ثمانية واربعين وتقوم مكسرة الجدار اياه . عارف يحصل ايه ؟ كل الانظمة العربية تقع لأن الشعب العربي حايروح مهاجر لآسرائيل ومش حايبقى فيه برابرة حد ينتظرهم على رأي كفافيس . المهم الناس تصدق بوجود برابرة جايين للغزو .ده اهم من وجود البرابرو بجد . زي حكاية الجنجاويد .. اتكشفت وطلع ان الحكومة موالسة معاهم