Manal and Alaa's bit bucket free speech from the bletches

موقع التعذيب في مصر يمكن يكون أهم موقع مستضاف عندنا على خواديم manalaa.net، محررة الموقع قايمة بجهد جبار لتوثيق و متابعة كل المعروف عن ظاهرة التعذيب في مصر، الموقع مش بس آلية أفضل لنشر المعلومات اللي بيحصل عليها نشطاء حقوق الانسان و الصحافيين، الموقع بيقدم معلومات اضافية ده غير التصنيف و التبويب اللي هيسمحلنا نتابع سجل كل قسم شرطة مكان احتجاز و سجل كل جلاد أول بأول. الموقع كان له السبق في نشر أكثر من خبر عن التعذيب و عليه نشرة بريدية شبه أسبوعية بتلخص أحداث الأسبوع الماضي كله.

الموقع مرشح لجائزة صحافيين بلا حدود الخاصة في سياق مسابقة دش القلة لأفضل مدونات، يا ريت يا جماعة تدلوا بصوتكم لصالح الموقع لأنه يستحق يتعرف أكثر من كده و محررته تستحق أكثر من الجايزة بكثير.

التصويت من الرابط ده، و الموقع لسبب ما أحيانا اسمه بيكون مكتوب بالألماني Folter in Ägypten.

يمكنكم التصويت على فئة صحافيين بلا حدود فقط، لكن بالمرة بقى أحب أشجعكم تنتخبوا مدونة حواديت لصاحبتها رحاب بسام في فئة أفضل مدونة عربية، في عالم المدونات اللي مركزة على الكتابة الأدبية مفيش أحلى من كتابات رحاب و اللي مش مصدق أن رحاب تستاهل الجايزة يجرب يقرأ التدوينة دي.

متنسوش تمارسوا حقكم الديمقراطي في سماع كلامي و بلا خوف كده روحوا انتخبوا التعذيب في مصر و حواديت.