ترابط قوى الشعب

ترابط قوى الشعب

by wa7da from w3agaby.blogspot.com on Fri, 03/02/2006 - 23:39
لم اتمالك نفسي اليوم أمام هذا المشهد الرائع لترابط قوى الشعب العامل ...و الغير عامل احتفالا بنصرنا على العدو و طرده من استاد القاهرة شر طردة ... بخمسة أهداف نظيفة ( شوية ) ..ما هو احنا اللي جبنا الخامس برضه ..علشان محدش يتهمنا بالبخل على ضيوفنا ( اللي هما اعداءنا في أول الجملة) ..
المهم .. كنا بنتكلم عن قوى الشعب .. اه ..المشهد الرائع الذي يتكون من ثلاث ألوان أساسية هي بالصدفة البحتة ألوان العلم المصري ( الأحمر نسبة للقلعة الحمراء ..الأبيض .دي بقه القلعة البيضاء ..و الأسود ..و ده لون نهار لاعبي الفريق القومي الأعزاء جداً على قلوبنا لو استجرءوا و فكروا يخسروا لا سمح الله) ..
نرجع للمشهد ..السغادة الغامرة تملأ الشوارع .. الناس فرحانة بجد .. الشباب الواعد يجوب شوارع القاهرة (و أكيد غيرها من محافظات مصر ) في السيارات ..و علم مصر بيرفرف و الناس بتهتف ..و لأول مرة باقي الشعب لا يستنكر ..
و هاهي أم تصطحب ابنته الصغيرة التي لا تتعدي السابعة للمنزل بعد الفتح المبين و ألوان العلم علي حجاب الأم ووجه الصغيرة ..و البنات و الشباب في الشوارع يحملون العلم في تحدي واضح للعنصرية .. و أب يقود سيارة الأسرة بجواره المدام ..و الأولاد يلوحون بالعلم من شباك السيارة الخلفي .
شباب أحد الأحياء الشعبية بالقاهرة الذين تجمعوا لمشاهدة المباراة علي أحد الشاشات العملاقة التي وفرتها الدولة للشباب .. علشان ميفتهومش حاجة ..
أما الصورة الرائعة بحق فلقد رأيتها على الشاشة وقت المباراة (المعركة المذكورة سلفاً) ..نعم انه هو ..ولي العهد نفسه ..يجلس وسط صفوف المشاهدين من أبناء رعيته ( فرضنا هنا أن رجال أمن الدولة من أبناء رعيته .. ) مشجعاً جنودنا البواسل في مواجهة العدو السافر ( كفاية أن أسمها الكونغو "الديمقراطية" ) ...
جنودنا الذين أعادوا لنا الأمل في مستقبل أسعد..فمنتخبنا الذي تحدى الإعاقة (اعني الأصابة) و غياب بعض نجومه لم ييئس .. فها هو حسام حسن يعطي دفعة للشباب و يثبت أن الحياة لا تنتهي عند الأربعين .. و أحمد حسن يعطي درساً في المثابرة ..كل ما تحاول أكتر ..فرصتك في التهديف تكبر
و بالرغم من محاولات بعض من أعداء البلاد لخفض روح الشعب المعنوية بتتفيه هذا الإنجاز العظيم..
..لكن الشعب قاوم .. و قاوم .. و فرح قد ما ربنا قدره

يا رب زود فرحتنا .. يا رب ناخد الكاس يا رب ... يا رب عصام أحسن حارس و أحمد حسن
هداف البطولة ( متسألوش ازاي ).......

يا رب نتعلم أي حاجة يا رب .. حتى لو بس كانت إزاي نفرح مع بعض ...أو نزعل على بعض
يا رب أغفر لنا و أرحمنا ..نحن و غرقى العبارة "السلام 98" و سائر المسلمين
XML feed
full article | source
( categories: Egyptian Blogs | Probably Arabic )